Թուրքիայի փոխվարչապետը խիստ քննադատության է ենթարկել Իրանին

Թուրքիայի առաջին փոխվարչապետ Բյուլենթ Առինչը խիստ քննադատության է ենթարկել Սիրիայի հարցում Իրանի դիրքորոշումը։

«Այն, ինչ հիմա Ասադը կատարում է Սիրիայում, անցել է բոլոր սահմանները։ Նա խախտել է իսլամական բոլոր նորմերը և արժեքները», – ասել է Առինչը և ավելացրել՝ «ես զարմանում եմ, թե ինչու է Իրանը և տարածաշրջանի մյուս երկրները լռում Սիրիայում խաղաղ բնակչության նկատմամբ շարունակվող բռնությունների թեմայով։ Եթե այդ երկիրն անտարբեր է Սիրիայի ժողովրդի նկատմամբ կատարվող բռնություններին, ապա պետք է հրաժարվի «իսլամական» երկիր կոչվելուց»,– ասել է փոխվարչապետը։

Առինչը նաև քննադատել է ՄԱԿ-ի Անվտանգության խորհրդում Ռուսաստանի դիրքորոշումը։ «Ռուսաստանի և Չինաստանի գործողությունները նույնպես մեզ համար անհասկանալի են։ Ինչո՞ւ է լռում Իրաքի վարչապետ Մալիկին, երբ որ այնտեղ սպանում են իր արաբ եղբայրներին»,– ասել է նա։ Միևնույն ժամանակ Առինչը բացառել է Սիրիայում Թուրքիայի ռազմական միջամտությունը։ «Աշխարհը պետք է դատապարտի Ասադին։ Թուրքիան իր հերթին, միշտ աջակցում է Սիրիայի ժողովրդի պահանջներին, և մենք անում ենք ամեն ինչ, որպեսզի դադարեցվի արյունահեղությունն այդ երկրում»,– թուրք պաշտոնյայի խոսքերն է մեջբերում 1news.az-ը։