Ռուսական մաֆիայի ղեկավարների 70%-ը Վրաստանից են. Սաակաշվիլի

Վրաստանի նախագահ Միխայիլ Սաակաշվիլին հայտարարել է, որ կառավարությունը ճիշտ է արել, որ «վարդերի հեղափոխությունից» հետո աշխատանքից ազատել է ոստիկանության հին անձնակազմին և երկիրը մի քանի ամսով թողել է առանց ոստիկանների։ Այս մասին նա հայտարարել է Ջորջթաունի համալսարանում ելույթ ունենալիս՝ ԱՄՆ կատարած այցի շրջանակներում, հաղորդում է «Regnum» լրատվականը։

Սաակաշվիլիի խոսքերով՝ հեղափոխությունից հետո իրեն ու իր թիմին հաջողվեց ստեղծել լրիվ նոր ոստիկանություն, որին այսօր վստահում է Վրաստանի բնակչության 86%-ը, այն դեպքում, որ նախկին ոստիկանությանը վստահում էր բնակչության ընդհամենը 5%-ը։ «Դա ամենաբարձր ցուցանիշն է Եվրոպայում՝ մեր տարածաշրջանում հանցավորության ամենաբարձր ցուցանիշի պայմաններում։ Այսօր էլ ռուսական մաֆիայի ղեկավարների 70%-ը ծագումով Վրաստանից են։ Եվրամիության ճշգրիտ տվյալներով՝ մեր երկիրը ամենանվտանգն է Եվրոպայում, իսկ հանցավորության ցուցանիշը մեր երկրում ամենացածրն է»,– հայտարարել է Սաակաշվիլին։