ԵՊՀ-ն տարածաշրջանի առաջատար համալսարանն է

«Webometrics» կազմակերպությունը, որն աշխարհում ամենաճանաչվածներից է բուհերի ռեյթինգավորման ոլորտում, հրապարակել է իր հերթական ուսումնասիրությունների արդյունքները։ ԵՊՀ-ն 1056 տեղով բարելավել է իր ցուցանիշն ու բարձրացել 1880-րդ հորիզոնական։ Երևանի մայր բուհը առաջատարն է ոչ միայն Հայաստանի, այլև տարածաշրջանի համալսարանների շարքում։ Թբիլիսիի պետական համալսարանն, օրինակ, 2464-րդն է, իսկ Ադրբեջանի լավագույն բուհը համարվող Խազարի համալսարանը՝ 6233-րդը։

Այս անգամ ռեյթինգավորվել է աշխարհի 20000 համալսարան։ Դասակարգումը կատարելիս «Webometrics»-ը հաշվի է առնում պաշտոնական կայքի էջերի քանակը Google.com, Yahoo.com, Live.com (msn), Exalenq.com որոնողական համակարգերում, այլ ռեսուրսներից բուհի պաշտոնական կայքին արված արտաքին հղումների քանակը, կայքում առկա փաստաթղթերի քանակն ու գիտական աշխատանքների հղման ինդեքսը:

ԵՊՀ-ն մինչ այժմ անշեղորեն աճ է գրանցում «Webometrics»-ի դասակարգումներում։ 2010 թ. առաջին զեկույցի ժամանակ Հայաստանի առաջատար բուհը 4392-րդն էր, իսկ նախորդ աղյուսակում՝ 2856-րդը։