Հարավային Օսիայի նախագահի թեկնածու Ալլա Ջիոևան վերակենդանացման բաժանմունքից տեղափոխվել է պալատ

Հարավային Օսիայի նախագահի նախկին թեկնածու Ալլա Ջիոևան վերակենդանացման բաժանմունքից այսօր տեղափոխվել է ընդհանուր թերապիայի սովորական պալատ, հաղորդում է «Ռիա նովոստի»-ն՝ վկայակոչելով բուժհիմնարկի գլխավոր բժիշկը ։

Հիշեցնենք, որ Ջիոևան վերակենդանացման բաժանմունք էր տեղափոխվել այն բանից հետո, երբ հատուկջոկատայինները փետրվարի 9-ին ներխուժել էին իր նախընտրական շտաբ։ Ջոևան հիվանդանոց է տեղափոխվել հիպերտոնիկ կրիզ ախտորոշմամբ։

Հիշեցնենք նաև, որ կրթության նախկին նախարար Ջիոևան 2011-ի նախագահական ընտրություններին մասնակցել է իբրև ընդդիմադիր թեկնածու։

Ընտրությունների երկրորդ փուլում, վերջին հրապարակված արդյունքների համաձայն, Ջիոևան հաղթել էր,սակայն երկրի Գերագույն դատարանն անվավեր էր ճանաչել ընտրությունների արդյունքները, ինչից հետո խորհրդարանը նախագահական նոր ընտրություններ էր նշանակել 2012-ի մարտի 25-ին։

Ջիոևան խորհրդարանի որոշումը համարել էր ապօրինի և պատրաստվում էր փետրվարի 10-ին երդմնակալության արարողություն կազմակերպել։