Ցխինվալիում տեղի ունեցածի համար պատասխանատու է Ռուսաստանը. Վրաստանի ԱԳՆ

Պաշտոնական Թբիլիսին ևս մեկ անգամ հաստատում է, որ Ցխինվալիի շրջանում բոլոր գործողությունների պատասխանատուն, իր համոզմամբ, Ռուսաստանն է։ 

Այսօր տեղի ունեցած մամլո ասուլիսի ժամանակ Վրաստանի Արտաքին գործերի նախարարի տեղակալ Նինո Կալանդաձեն հայտարարել է, որ պաշտոնական Թբիլիսիի համար դժվար է մեկնաբանել, թե ինչ է կատարվում Ցխինվալիի օկուպացված տարածաշրջանում։

«Ներկայիս իրադարձությունները փաստում են այն մասին, որ այդ տարածքում իշխում է անօրինականությունը և օրենքի նկատմամբ անհարգալից վերաբերմունքը։ Բոլոր իրադարձությունների և մասնավորապես այդ իրադարձությունների պատասխանատվությունն ամբոջությամբ ընկած է տարածքն օկուպացրած Ռուսաստանի վրա», – ասել է Կալանդաձեն։

Ըստ նրա, Ռուսաստանը մի կողմից անօրինականորեն զավթել է ինքնիշխան պետության տարածքը, մյուս կողմից ի վիճակի չէ պաշտպանել այդ պետության քաղաքացիների իրավունքները։

Հիշեցնենք, որ փետրվարի 9–ին հատուկ ջոկատայինները ներխուժել էին Հարավային Օսիայի նախագահի նախկին թեկնածու, ընդդիմության առաջնորդ Ալլա Ջիոևայի նախընտրական շտաբ, ինչի հետևանքով նախկին թեկնածուն անգիտակից վիճակում տեղափոխվել էր հիվանդանոց, հաղորդում է Грузия Online–ը։