Հասարակության զգալի հատվածն, այդուամենայնիվ, չի վստահում դատական համակարգին. Հրայր Թովմասյան

ՀՀ արդարադատության նախարար Հրայր Թովմասյանն այսօր ընդունեց Հայաստանի Հանրապետությունում Մեծ Բրիտանիայի եւ Հյուսիսային Իռլանդիայի Միացյալ Թագավորության նորանշանակ դեսպան Քեթրին (Քեթի) Լիչին։

Պարոն Թովմասյանը տիկին Լիչի խնդրանքով ներկայացրեց նախարարության գերակա, ինչպես նաև առաջնահերթ լուծում պահանջող խնդիրները: Նախարարը նշեց նաև, որ անկախացումից հետո Հայաստանի Հանրապետությունում զգալի աշխատանք է կատարվել դատաիրավական համակարգը բարեփոխելու ուղղությամբ, կան հաջողություններ և որոշակի առաջընթաց, արդյունքները, սակայն, բավարար չեն դեռևս. հասարակության զգալի հատվածն, այդուամենայնիվ, չի վստահում դատական համակարգին, ընդծեց արդարադատության նախարարը:

Միևնույն ժամանակ Հրայր Թովմասյանը վստահություն հայտնեց, որ 2012-2016 թվականների համար մշակված դատաիրավական բարեփոխումների ծրագիրն իրականացնելու դեպքում, հնարավոր է գործնականում հասնել էական փոփոխությունների և համակարգում ունենալ բոլորովին այլ պատկեր:

Դեսպան Լիչը, շնորհակալություն հայտնելով նախարար Թովմասյանին, իրավիճակը ներկայացնելու համար, նկատեց, որ թեև պետությունը երիտասարդ է, այդուհանդերձ առաջընթացը տպավորիչ է:

Հանդիպման ավարտին ՀՀ արդարադատության նախարար Հրայր Թովմասյանը հյուրի խնդրանքով ներկայացրեց նաև քրեակատարողական հիմնարկների վիճակը և այն բարելավելու հրատապ անհրաժեշտությունն ու քայլերը:

Կողմերը պատրաստակամություն հայտնեցին շարունակել և էլ ավելի արդյունավետ դարձնել արդարադատության ոլորտում երկու երկրների միջև համագործակցությունը: