Վրացի պաշտոնյայի պատճառով ռուս–ուկրաինական նոր սկանդալ է հասունանում

Վրաստանին ուկրաինական զենքի մատակարարման հետ կապված նոր սկանդալ է հասունանում Ուկրաինայի և Ռուսաստանի միջև։ Վրաստանի փոխվարչապետ, եվրոպական և եվրոատլանտյան ինտեգրման հարցերով նախարար Գեորգի Բարամիձեն «Зеркало недели» ուկրաինական թերթին տված հարցարզույցում փաստել է, որ այդ պայմանագրերը շարունակվում են գործել։ Հարավօսական պատերազմից հետո պաշտոնական Կիևը վստահեցրել էր, որ հավատարիմ է մնում Թբիլիսիին սպառազինություններ մատակարարելու արգելքին, սակայն վրացի պաշտոնյան, փաստորեն, տեղեկատվական արտահոսք է տվել այն մասին, որ ուկրաինական զենքի մատակարարումը Վրաստանին շարունակվում է։

Փորձագետների կարծիքով, սենսացիոն տեղեկատվության տարածումը Ռուսաստանի նախագահական ընտրությունների շեմին կարող է քաղաքական ներքին խարդավանքների նպատակ ունենալ, հաղորդում է «Նեզավիսիմայա գազետա»-ն։

Բարամիձեն հաստատել է, որ Վիկտոր Յանուկովիչը չի կիսում Ռուսաստանի կառավարության այն տեսակետը, որ Վրաստանի սպառազինումը բարդացնում է իրավիճակը Հարավային Կովկասում։  

«Մոսկվան չի կիսում գրեթե ողջ միջազգային հանրության դիրքորոշումը», - ասել է նա, սակայն հրաժարվել է մանրամասնել Կիևի և Թբիլիսիի միջև ռազմատեխնիկական համագործակցության խնդիրները։ Ուկրաինայի իշխանությունները դեռևս չեն մեկնաբանել վրացի պաշտոնիայի խոստովանությունը։ 

Հիշեցենք, որ 2008–ի օգոստոսին Հարավային Օսիայի պատերազմից հետո Ուկրաինայի իշխանությունները պաշտոնական Մոսկվային խոստացել էին, որ Վրաստանին այլևս զենք չեն մատակարարելու։