Սերժ Սարգսյանն ընդունել է «ՖՐՈՆՏԵՔՍ»-ի գործադիր տնօրենին

Նախագահ Սերժ Սարգսյանն այսօր ընդունել է Եվրամիության արտաքին սահմաններում համագործակցության օպերատիվ կառավարման գործակալության՝ «ՖՐՈՆՏԵՔՍ»-ի գործադիր տնօրեն Իլկա Լայտինենին: Այս մասին ասված է ՀՀ նախագահի պաշտոնական կայքում տեղադրված հաղորդագրության մեջ:

Զրուցակիցները կարևորել են Հայաստան-Եվրամիություն համագործակցության զարգացումը, որի օրակարգը, կողմերի հավաստմամբ, տարեցտարի հարստանում է նոր ոլորտներով: Սահմանների կառավարման ոլորտում փոխգործակցությունը և սահմանային անվտանգության ապահովումը Հայաստանի համար արդիական խնդիր համարելով՝ Նախագահ Սերժ Սարգսյանն այդ տեսանկյունից կարևորել է «ՖՐՈՆՏԵՔՍ»-ի գործադիր տնօրենի այցը մեր երկիր: Նախագահն ընդգծել է, որ նշված ուղղությամբ նախաձեռնված բարեփոխումների շրջանակում ընթացիկ տարվանից Հայաստանում սկսվելու են ենթակառուցվածքների ամբողջական վերափոխման, սարքավորումների վերազինման և անձնակազմի վերապատրաստման ուղղությամբ աշխատանքները: Հանրապետության ղեկավարը հույս է հայտնել, որ «ՖՐՈՆՏԵՔՍ»-ի օժանդակությամբ այդ աշխատանքները հաջողությամբ ավարտին կհասցվեն:

ԵՄ արտաքին սահմաններում համագործակցության օպերատիվ կառավարման գործակալության գործադիր տնօրենը գոհունակությամբ է նշել, որ այցի շրջանակներում ՀՀ ազգային անվտանգության խորհրդի աշխատակազմի և «ՖՐՈՆՏԵՔՍ»-ի միջև ստորագրվելու է գործառնական համագործակցության համաձայնագիր, որը փոխադարձաբար օգտակար կլինի և՛ Հայաստանի, և՛ գործակալության, և՛ ԵՄ երկրների համար: