Պուտինն արտաքին քաղաքականությանը վերաբերող իր հոդվածում Հարավային Կովկասի երկրներին չի անդրադարձել

ՌԴ վարչապետ, նախագահի թեկնածու Վլադիմիր Պուտինը հանդես է եկել նոր հոդվածով, որը վերաբերում է Ռուսաստանի արտաքին քաղաքականության իր պատկերացումներին։ Հոդվածը վերնագրված է «Ռուսաստանը և փոփոխվող աշխարհը» և հրապարակվել է այսօր՝ «Մոսկովսկիե նովոստի» թերթում։ 

Պուտինի նոր հոդվածը բաղկացած է մի քանի թեմատիկ հատվածներից՝ «Ո՞վ է խարխլում վստահությունը», ««Արաբական գարուն». դասեր և եզրահանգումներ», «Նոր մարտահրավերներ և սպառնալիքներ», «Ասիական-Խաղաղօվկիանոսյան տարածաշրջանի դերի բարձրացումը», «Եվրոպական ֆակտոր», «Ռուս-ամերիկյան հարաբերություններ», «Տնտեսական դիվանագիտություն», «Համերկրացիների աջակցություն և հումանիտար հարթություն»։ Իր հոդվածում Պուտինը, մասնավորապես, անդրադարձել է Իրանի միջուկային խնդրին, «արաբական գարնան» հետևանքներին, ռուս-ամերիկյան հարաբերություններին և անգամ մերձբալթյան երկրներին, այդ թվում՝ Լատվիայում ռուսաց լեզվի կարգավիճակի հարցին։ 

Հոդվածում, սակայն, Պուտինը չի անդրադարձել Հարավային Կովկասի երկրների հետ հարաբերություններին։ Հոդվածում չի հիշատակվում ո՛չ Հայաստանը, ո՛չ Վրաստանը և ո՛չ էլ Ադրբեջանը, անդրադարձ չկա նաև Լեռնային Ղարաբաղի հակամարտության կարգավորման խնդրին։