Ռուսաստանում Հարավային Օսիայի դեսպանին ԿԸՀ–ն գրանցել է որպես նախագահի թեկնածու

Հարավային Օսիայի Կենտրոնական ընտրական հանձնաժողովը Ռուսաստանում Հարավային Օսիայի դեսպան Դմիտրի Մեդոևին գրանցել է նախագահի թեկնածու, հաղորդում է «Ռիա նովոստի»-ն՝ մեջբերելով Հարավային Օսիայի ԿԸՀ նախագահ Բելլա Պլիևայի խոսքերը։

Համաձայն Հարավային Օսիայի խորհրդարանի կայացրած որոշման՝ նախագահի վերընտրությունը տեղի է ունենալու մարտի 25–ին։ 2011–ի նոյեմբերի 27–ին այդ երկրում տեղի ունեցած նախագահական ընտրությունների արդյունքները Գերագույն դատարանն անվավեր էր ճանաչել՝ թույլ տրված կոպիտ խախտումների պատճառով։

«ՌԴ–ում Հարավային Օսիայի դեսպան Դմիտրի Մեդոևը գրանցվել է նախագահի թեկնածու։ Նախագահի թեկնածու գրանցվելու հայտ ներկայացրած «Югосетсоцстрах» ապահովագրական ընկերության գլխավոր տնօրեն Ֆելիքս Բիտիևի և գործարար Ռուստեմ Ջիոևայի թեկնածությունները ԿԸՀ–ն հրաժարվել է գրանցել՝ բավարար տվյալներ և ստորագրություններ չներկայացնելու համար», – ասել է ԿԸՀ նախագահ Բելլա Պլիևան։

Ըստ նրա՝ Պետական անվտանգության ծառայության սպա և դատական ակտերի գլխավոր հարկադիր կատարող Սեգեյ Բիտիևը երեքշաբթի ներկայացնելու է նախագահի թեկնածու գրանցվելու հայտը։ 

Նախագահի հավանական 22 թեկնածուներից Հարավային Օսիայի ԿԸՀ–ն գրանցել է ընդամենը երեք թեկնածուի, ևս երկուսը դեռ սպասում են ԿԸՀ–ի որոշմանը։ Մնացած 13 հայտատուների դիմումները մերժվել են համապատասխան տվյալներ չներկայացնելու համար։
Գրանցված նախագահի թեկնածուների վերջնական ցուցակը ԿԸՀ–ը հրապարակելու է փետրվարի 29–ին։