Ադրբեջանը հրաժարվում է պատմության կեղծման դեմ պայքարող փորձագետներին Խոջալուի վերաբերյալ նյութեր տրամադրել

Լուրեր.com-ի զրուցակիցն է «Պատմության կեղծման դեմ պայքարի միջազգային փորձագետների խմբի» կոորդինատոր Կարինե Բարսեղյանը։ 

-Տիկին Բարսեղյան, ինչպիսի՞ գործունեություն է ծավալում «Պատմության կեղծման դեմ պայքարի միջազգային փորձագետների խումբ»-ը։

- Նախաձեռնությունը հիմնադրվել է Հռոմում՝ 2011-ի հոկտեմբերին։ Այն միավորում է պատմաբանների, կոնֆլիկտոլոգների, նախկին զինվորականների, քաղաքական ու հասարակական գործիչների և լրագրողների։ Խումբը մի քանի երկրներում ուսումնասիրություններ է անցկացնում, այդ թվում՝ կապված Խոջալուի ու նաև բալկանյան տարածաշրջանում տեղի ունեցած դեպքերի հետ։ Վրաստանում մենք ներկայացված ենք չորս հոգով, ես՝ որպես հասարակական գործիչ, մյուս երեքը լրագրող, նախկին զինվորական և պատմաբան են։ Մենք դիմել ենք հայկական և ադրբեջանական կողմերին՝ խնդրելով հնարավորություն ընձեռել ուսումնասիրել Խոջալուի դեպքերի հետ կապված արխիվային նյութերը։ Ադրբեջանական կողմը հրաժարվել է, իսկ Հայաստանը մեզ օգնում է Խոջալուի իրադարձությունների ուսումնասիրման գործում։

-Իսկ ո՞ւմ եք դուք դիմել։

-Մենք դիմել ենք Արտաքին գործերի նախարարություն։

-Ինչպիսի՞ այլ կազմակերպությունների հետ եք դուք համագործակցում՝ հայաստանյան, ադրբեջանական կամ եվրոպական...

-Ինձ, օրինակ, վերջերս զանգահարեց Մոնիկա Ռոսսին, որը լրագրող է Ֆլորենցիայից և որը նույն պես զբաղվում է նմանատիպ ուսումնասիրությամբ։ Մենք նաև ժամանել էինք Հայաստան, եղել ենք Լեռնային Ղարաբաղում... Այժմ մենք պահանջում ենք, որպեսզի Ադրբեջանը մեզ թույլատրի ուսումնասիրել արխիվային նյութերը, ինչպես նաև թույլ տա, որ մեր խումբը հարցազրույցներ անցկացնի Խոջալուի իրադարձությունների ականատեսների հետ։ Երբ Լեռնային Ղարաբաղում էինք, մենք հարցազրույցներ ենք անցկացրել Խոջալուի դեպքերի հայ ականատեսների շրջանում, ու ակնհայտ դարձավ, որ Ադրբեջանում ևս կան մարդիկ, որոնք ականատես են եղել Խոջալուի դեպքերին։ Ղարաբաղում ականատեսների հետ զրույցներից պարզ դարձավ, որ ադրբեջանցիների կողմից ներկայացվող լուսանկարներն իրականում կեղծ են և վերաբերում են այլ պատմական իրադարձություններին։ Մասնավորապես, իբրև Խոջալուի «ողբերգության» ապացույց ներկայացվող որոշ լուսանկարներ իրականում պատկերում են Թուրքիայում տեղի ունեցած երկրաշարժի հետևանքները, Ալբանիայում, Կոսովոյում և այլ աշխարհագրական վայրերում տեղի ունեցած իրադարձությունները։

-Լավ, իսկ ի՞նչ եք անելու, եթե ադրբեջանական կողմը կրկին մերժի ձեզ տրամադրել այդ արխիվային նյութերը։

-Մենք հուսով ենք, որ Ադրբեջանը վերջիվերջո այդ նյութերն ուսումնասիրելու հնարավորություն կընձեռի մեզ։

-Ծրագրո՞ւմ եք արդյոք ապագայում ուսումնասիրել նաև Հայոց ցեղասպանության հարցը։

-Մենք այդ հարցը դեռևս չենք բարձրացնում։ Մեր գործունեության հաջորդ փուլում մենք պատրաստվում ենք ուսումնասիրել բալկանյան երկրներում տեղ գտած իրադարձությունները։

-Որքան գիտեմ, «Պատմության կեղծման դեմ պայքարի միջազգային փորձագետների խումբը» նաև պաշտոնական կայք ունի, որը այս պահին չի գործում։ Ինչո՞ւ։

- Ցավոք սրտի, արդեն երկու օր է՝ կայքը չի գործում։ Մենք ենթադրում ենք, որ մեր կայքը ենթարկվել է հաքերական հարձակման։ Այս պահին մենք կայքն օգտատերերին հասանելի դարձնելու ուղղությամբ աշխատանքներ ենք տանում։

-Իսկ ինչպիսի՞ հասարակական գործունեություն եք Դուք ծավալում Վրաստանում։

-Ես ներկայացնում եմ մի հասարակական կազմակերպություն, որը զբաղվում է Վրաստանում հայերի իրավունքների պաշտպանությամբ («Վրաստանի հայերի իրավունքների պաշտպանության ասոցիացիա» հ/կ) ու նաև հանդիսանում եմ վերոնշյալ փորձագետների խմբի համակարգողը։

-Ւնչպե՞ս կարելի է կապվել ձեզ հետ։

-Էլեկտրոնային հասցեի միջոցով՝ [email protected]