Վրաստանն իր պայմաններն է առաջարկել Ռուսաստանի հետ հարաբերությունները վերսկսելու առնչությամբ

Վրաստանը պատրաստ է վերականգնել դիվանագիտական հարաբերությունները Ռուսաստանի հետ միայն այն դեպքում, եթե Մոսկվան Աբխազիան և Հարավային Օսիան ճանաչի որպես Վրաստանի մաս կազմող շրջաններ։ Այս մասին ասել է Վրաստանի փոխարտգործնախարար Սերգեյ Կապանաձեն։

«Եթե Ռուսաստանը ցանկանում է վերանայել 2008-ի օգոստոսի 26–ի իր որոշումն այդ երկու այսպես կոչված հանրապետությունների կամ գրավյալ տարածքների դեօկուպացիայի ենթարկելու վերաբերյալ և եթե կատարի օգոստոսի 12–ի պայմանագրի դրույթները, ապա այդ դեպքում, իհարկե, ամեն ինչ կարող է պատահել», - ասել է Կապանաձեն լրագրողների հետ հանդիպման ժամանակ։

Ըստ նրա` Թբիլիսին հույս ունի, որ Մոսկվան նույնպես Վրաստանի քաղաքացիների համար առանց վիզայի իր երկիր մուտք գործելու հնարավորություն կտա, ինչպես արեցին Վրաստանի իշխանությունները՝ Ռուսաստանի քաղաքացիների պարագայում։

Ուրբաթ Ռուսաստանի արտգործնախարարության խոսնակ Ալեքսանդր Լուկաշևիչը ասել էր, որ Մոսկվան Թբիլիսիին առաջարկում է  վերականգնել դիվանագիտական հարաբերությունները, ինչպես նաև վիզային ռեժիմի վերացման իր պատրաստակամությունը՝ միայն Ռուսաստանի քաղաքացիներին անվտանգության երաշխիքներ ապահովելու պայմանով, հաղորդում է BBC Russian–ը։

«Մենք եղել և մնում ենք հետաքրքրված Ռուսաստանի և Վրաստանի ժողովուրդների միջև կապն ամրապնդելու հարցով։ Մենք պատրաստ ենք Վրաստանի քաղաքացիների մուտքը Ռուսաստան թույատրել առանց վիզային ռեժիմի կիրառման։ Իսկ դրա համար պետք է, որ վրացական կողմը հուսալի իրավական միջավայր ապահովի և Վրաստան ժամանող Ռուսաստանի քաղաքացիների անվտնագությունն ապահովելու երաշխիքներ տրամադրի», – ասել է Լուկաշևիչը։