Ռուսաստանը և Ադրբեջանը շուտով համաձայնության կգան Գաբալայի ռադարային կայանի վարձակալության հարցով

Ռուսաստանը և Ադրբեջանը մոտ են Գաբալայի ռադիոլոկացիոն կայանի վարձակալության հարցով բանակցությունների ավարտին, հաղորդում է «Ռիա նովոստի»-ն։

«Մենք այժմ ավելի մոտ ենք բանակցությունների ավարտին, քան նախկինում։ Գաբալայի ռադիոլոկացիոն կայանի հարցով բանակցություններում մենք որոշակի առաջաընթաց ենք գրանցել, թեև վարձավճարի և վարձակալության որոշակի պայմանների շուրջ որոշակի խմդիրներ կան», – ասել է գործակալության աղբյուրը։

Ըստ նրա՝ Ադրբեջանի հետ Գաբալայի ռադիոլոկացիոն կայանի վարձկալության հարցը Ռուսաստանի արտաքին գործերի նախարարության և պաշտպանության նախարարության առաջնահերթությունններից է համարվում։ 

Նախորդ շաբաթ ՌԴ արտգործնախարարությունը և պաշտպանության նախարարությունը հաղորդագրություն էին տարածել, որ Ադրբեջանը մտադիր է Գաբալայի ռադիոլոկացիոն կայանի վարձակալության արժեքը 7 միլիոն դոլարից հասցնել մինչև 300 միլիոն դոլարի։

ԽՍՀՄ ժամանակներից սկսած՝ Գաբալայի ռադիոլոկացիոն կայանը հակահրթիռային պաշտպանության համակարգի ոլորտում կարևորագույն դեր է զբաղեցնում։ Ադրբեջանի անկախացումից հետո Ռուսաստանը մինչ այսօր շարունակում է շահագործել այդ կայանը։ Ադրբեջանի և Ռուսաստանի միջև կայանի վարձակալության շուրջ պայմանագիրը ստորագրվել է 2002–ին, իսկ վարձակալության ժամկետը սպառվում է 2012–ի դեկտեմբերի 24–ին։