Ադրբեջանի, Թուրքիայի ու Իրանի արտգործնախարարները համատեղ հայտարարություն են արել

Մարտի 7-ին Նախիջևանում կայացել է Ադրբեջանի, Թուրքիայի և Իրանի արտգործնախարարներ Էլմար Մամեդյարովի, Ահմեդ Դավութօղլուի, Ալի Ակբար Սալեհիի հանդիպումը։ Հանդիպման արդյունքում ընդունվել է համատեղ հայտարարություն։ 

Մամեդյարովը վստահություն է հայտնել, որ հանդիպումը հիմք կհանդիսանա երեք երկրների միջև հետագա համագործակցության համար՝ հավելելով, որ հերթական հանդիպումը նախատեսված է անցկացնել ընթացիկ տարվա սեպտեմբերին՝ Վանում։ 

Թուրքիայի և Իրանի արտգործնախարարները ևս ընդգծել են նման հանդիպումների կարևորությունը, հաղորդում է 1news.az-ը։

Ընդունված համատեղ հայտարարության մեջ կողմերն ընդգծել են ղարաբաղյան հակամարտության շուտափույթ լուծման անհրաժեշտությունը՝ ինքնիշխանության, տարածքային ամբողջականության և միջազգային հանրության կողմից ճանաչված սահմաններից ելնելով։