ԼՂ հակամարտությունը ռազմական լուծում չունի. ԱՄՆ Պետդեպարտամենտ

Ղարաբաղյան հակամարտությունը ռազմական լուծում չունի։ Այս մասին նախօրեին հաղորդագրություն է տարածել ԱՄՆ Պետդեպը։

Պետքարտուղարության հերթական ճեպազրույցի ժամանակ լրագրողները խնդրել են պետդեպի ներկայացուցիչ Վիկորիա Նուլանդին մեկնաբանել ադրբեջանական կողմի վերջին հայտարարությունները, որոնք վերաբերում էին ղարաբաղյան խնդիրը միայն ռազմական ճանապարհով լուծելու հնարավոր տարբերակին։

«Որպես ԵԱՀԿ Մինսկի խմբի համանախագահ երկիր՝ ԱՄՆ-ն հաստատակամ է իր դիրքորոշման մեջ՝ օգնելու հակամարտող երկու կողմերին ԼՂ հակամարտության խաղաղ կարգավորմանը հասնելու համար։ ԼՂ հակամարտությունը ռազմական լուծում չունի», – ընդգծել է ԱՄՆ արտաքին քաղաքական գերատեսչությունը։

Միացյալ նահանգներն այս առումով հակամարտող երկու կողմերին կոչ են անում իրենց ժողովուրդներին խաղաղության նախապատրաստել և ոչ թե պատերազմի և ձեռնպահ մնալ սադրիչ հռետորբանությունից և գործողություններից։ Այս մասին նշված է ԱՄՆ Պետդեպի պաշտոնական մամլո հաղորդագրությունում։