Միջազգային լրատվամիջոցներն անհրաժեշտ ուշադրություն չեն դարձնում Հարավային Կովկասին. ՆԱՏՕ

Հարավային Կովկասում և Կենտրոնական Ասիայում ՆԱՏՕ-ի հատուկ ներկայացուցիչ Ջեյմս Ապաթուրայը դաշինքի YouTube–ի պաշտոնական ալիքում անդրադարձել է ՆԱՏՕ–ի կողմից հայ–ադրբեջանական հակամարտության վրա հնարավոր ազդեցության և խնդրի կարգավորման մասին։

«ՆԱՏՕ-ն ԼՂ հակամարտության կարգավորման գործընթացին մասնակցելու ծրագրեր և մտադրություններ չունի։ Դաշինքն առաջին հերթին աջակցում է ԵԱՀԿ Մինսկի խմբի շրջանակներում Հայաստանի և Ադրբեջանի նախագահների մասնակցությամբ հակամարտության խաղաղ կարգավորման ձևաչափը։ Միայն վերջին մի քանի շաբաթների ընթացքում ՆԱՏՕ–ի կենտրոնակայանում մենք լսել ենք երկու երկրների նախագահների այն հայտարարությունները, ըստ որոնց՝ նրանք պարտավորվել են հակամարտությունը լուծել խաղաղ ճանապարհով», – ասել է Ապաթուրայը, միևնույն ժամանակ ընդունելով, որ իրականում Մինսկի խմբի գործընթացը հատկապես վերջին շրջանում լուրջ դժվարությունների առաջ է կանգնած։

ՆԱՏՕ–ի տարածաշրջանային ներկայացուցիչը նշել է, որ վերջերս հակամարտող կողմերի միջև հաճախակիացել է ռազմատենչ հռետորաբանությունը, որն ուղեկցվում է ռազմական ներուժի ավելացումով։ 

«Այդ տարածաշրջանը միջազգային մամուլի կողմից արժանի ուշադրություն չի ստանում», – ասել է ՆԱՏՕ-ի հարավկովկասյան ներկայացուցիչը։ Նա ընդգծել է, որ ԼՂ հակամարտության խաղաղ կարգավորումը պետք է լուծվի միջազգային իրավունքի սկզբունքների հիման վրա։

«ՆԱՏՕ-ն հուսով է, որ հակամարտության խաղաղ լուծումը վերջապես կգտնվի, սակայն ՆԱՏՕ–ն այդ գործընթացին չի մասնակցում։ Մենք միայն պատրաստ ենք աջակցել ԵԱՀԿ Մինսկի խմբի՝ հակամարտության խաղաղ կարգավորմանն ուղղված ջանքերին», – ամփոփել է Ապաթուրայը։