ԵվրԱզԷՍ-ի անդամ երկրների ղեկավարները Մոսկվայում կքննարկեն հետխորհրդային երկրների ինտեգրացիոն գործընթացները

Եվրասիական տնտեսական ընկերակցության (ԵվրԱզԷՍ) անդամ երկրների ղեկավարներն այսօր Մոսկվայում կքննարկեն հետխորհրդային երկրների ինտեգրացիոն գործընթացների հեռանկարը, այդ թվում նաև կազմակերպության զարգացման ծրագրերը, այս մասին նշվում է Ռուսաստանի նախագահի մամլո ծառայության տարածած հաղորդագրությունում։  

Կազմակերպության միջպետական խորհրդի հանդիպմանը մասնակցելու են Ռուսաստանի, Բելառուսի, Ղազախստանի, Ղրղզսզստանի և Տաջիկստանի նախագահները, ինչպես նաև դիտորդի կարգավիճակով հանդիպմանը մասնակցելու են Հայաստանի, Մոլդովայի և Ուկրաինայի ղեկավարները։

ԵվրԱզԷՍ–ի շրջանականերում նման ձևաչափով հանդիպում առաջին անգամ է անցկացվում։

2011–ի դեկտեմբերի 19–ին Մոսկվայում՝ Ռուսաստանի, Բելառուսի և Ղազախստանի նախագահները համաձայնագիր ստորագրեցին հետխորհրդային տարածաշրջանի հանրապետությունների ինտեգրացիոն գործընթացները զարգացնելու և տնտեսական համագործակցությունը խորացնելու վերաբերյալ։ 

«Առաջիկա հանդիպումը մեծ նշանակություն ունի Եվրասիական տնտեսական համագործակցության հետագա խորացման առումով։ Ակնկալվում է, որ կառույցի անդամ երկրների ղեկավարները որոշումներ կկայացնեն տարածաշրջանային ինտեգրացիոն գործընթացների ուրվագիծը հստակեցնելու առումով», – նշված է հայտարարության մեջ։