Լեոնիդ Տիբիլյովը և Դավիդ Սանակոևն անցել են Հարավային Օսիայի նախագահի ընտրությունների երկրորդ փուլ

ԿԳԲ–ի նախկին պետ Լեոնիդ Տիբիլյովը և մարդու իրավունքների հանձնակատար Դավիդ Սանակոևն անցել են Հարավային Օսիայի նախագահի ընտրությունների երկրորդ փուլ՝ համապատասխանաբար հավաքելով 41.94% և 25.36% ձայն՝ 40% հաշվարկված քվեաթերթիկների արդյունքներով։ Նախնական տվյալները հայտարարել է ԿԸՀ–ի մամլո քարտուղար Բելա Պլիևան։ 

Ըստ նրա, ՌԴ–ում Հարավային Օսիայի դեսպան Դմիտրի Մեդոևը հավաքել է 23.8%, իսկ Հարավային Օսիայի կոմունիստների ղեկավար Ստանիսլավ Կոչիևը՝ 5.62% ձայն։ «Բոլորին դեմ» են քվեարկել ընտրողների 0.98%–ը, հաղորդում է Itar-Tass–ը։

Այսպիսով, Տիբիլյովը և Սանակոևը անցել են ընտրությունների երկրորդ փուլ, որը պետք է տեղի ունենա առաջիկա 15 օրվա ընթացքում։ Երկրորդ փուլում ընտրությունը վավեր կճանաչվի այն դեպքում, եթե առնվազն 30% մասնակցություն լինի ընտրողների կողմից։ Հարավային Օսիայում ընտրողների թիվը գերազանցում է 34 հազարը։

Պլիևան նշել է, որ նախնական տվյալները Կենտրոնական ընտրական հանձնաժողովը կվերանայի և դրանց վերաբերյալ պաշտոնական տեղեկություն կհրապարակի երկուշաբթի առավոտյան։