Հիլարի Քլինթոնը խոստացել է շարունակել ճնշումները Թուրքիայի նկատմամբ եկեղացական կալվածքների վերադարձման հարցում

ԱՄՆ կոնգրեսական Հովարդ Բերմանը Կոնգրեսի հերթական լսումների ժամանակ Թուրքիայում հայկական եկեղեցիների վերդարձման, ԼՂ հակամարտության կարգավորման և Ջավախքի խնդրի վերաբերյալ մի քանի հարցեր է ուղղել պետաքրտուղար Հիլարի Քլինթոնին, հաղորդում է ԱՄՆ Հայ դատի հանձնախումբը։

Կոնգրեսականը կոչ է արել Քլինթոնին շարունակել ճնշումները Թուրքիայի իշխանությունների վրա՝ կապված այդ տարածքներում եկեղեցական ունեցվածքի, ինչպես նաև եկեղեցիների կարգավիճակի ճանաչման հարցերով, և ստիպել պաշտոնական Անկարային հռետորաբանությունից անցնել գործնական քայլերի։ 

Կոնգրեսականը ԼՂ հակամարտության վերաբերյալ հարցրել է, թե ինչ քայլեր է ձեռնարկում ԵԱՀԿ Մինսկի խմբի համանախագահ երկիր հանդիսացող ԱՄՆ–ը, կապված հակամարտող երկու երկրների ղեկավարների կողմից անցյալ տարի հրադադարի ռեժիմը չխախտելու վերաբերյալ համաձայնագրի կատարման առնչությամբ, նշելով, որ համաձայնագրի դրույթները միայն կատարում է Հայաստանը և Ղարաբաղյան կողմը։

«ԱՄՆ–ը կողմ է հակամարտության ԵԱՀԿ Մինսկի խմբի ձևաչափին և միշտ պատրաստ է ԼՂ հակամարտության խաղաղ և տևական կարգավորմանն աջակցելուն», – պատասխանել է Քլինթոնը։

Կալիֆոռնիայից ընտրված դեմոկրատ կոնգրեսականը պետքարտուղարին ուղղված հարցում կոչ է արել ԱՄՆ վարչակազմին ուշադրություն դարձնել Վրաստանի տարածքում գտնվող Ջավախքի խնդիրներին, մասնավորապես այդտեղի բնակչության սոցիալ–տնտեսական հիմնախնդիրների։ Բերմանը կոչ է արել Վրաստանին ԱՄՆ կառավարության կողմից հատկացվող ամենամյա ֆինանսական օգնության 10%–ը հատկացնել Ջավախքին։