Դավիդ Սանակոևը մտադիր է ստեղծել նոր կուսակցություն Հարավային Օսիայում

Դավիդ Սանակոևը, որն ըստ նախնական տվյալների, պարտվել է Հարավային Օսիայի նախագահական ընտրություններում, հայտարարել է նոր կուսակցություն ստեղծելու մասին, հաղորդում է Interfax–ը։

«Մենք չենք ընդունում ընտրությունների արդյունքները՝ որպես պարտություն։ Մենք գիտենք, որ մեր քաղաքացիների 42,98%-ը փոփոխություններ է ուզում, նոր ապագա է ցանկանում իր համար։ Եվ մենք կստեղծենք նոր կուսակցություն, որ ինձ ընտրողների յուրաքանչյուր ձայնը լսելի դարձնի նոր նախագահին», – ասել է պարտված թեկնածուն։

Սանակոևն արդեն ընդունել է պարտությունը և շնորհավորել հաղթած թեկնածու, հանրապետության ՊԱԿ նախկին ղեկավար Լեոնիդ Տիբիլովին։

Ըստ ԿԸՀ նախնական տվյալների, Հարավային Օսիայի նախագահի ընտրությունների երկրորդ փուլում Տիբիլյովը ստացել է 53.74% ձայն, իսկ Սանակոևը՝ 42,98% ձայն։

Հաղթող թեկնածուն արդեն հայտարարել է, որ մտադիր է իր նախկին մրցակցին հրավիրել իր թիմ։