Հայաստանում մահացությունը նվազել է

Հայաստանում հանրապետական ցուցանիշով գրանցվել է դրական բնական հավելաճ. ծննդյան դեպքերը գերացազել են մահվան դեպքերին 1.3 անգամ' 2015-ի առաջին կիսամյակի արդյունքներով: Սակայն որոշ մարզերում բնական նվազում է արձանագրվել' մահվան դեպքերը գերազանցել են ծննդյան դեպքերին: Բնական հավելաճի գործակիցը բացասական նիշով է Լոռիում, Տավուշում և Վայոց ձորում: «Արմենպրես»-ի հաղորդմամբ' այս մասին լրագրողների հետ հանդիպման ժամանակ հայտնեց Հայաստանի ազգային վիճակագրական ծառայության (ԱՎԾ) մարդահամարի և ժողովրդագրության բաժնի պետ Կարինե Կույումջյանը:

«Ծնվածների ընդհանուր թվաքանակը 2015-ի առաջին վեց ամիսներին 18 հազար 719 է ' 2014-ի առաջին վեց ամիսների 19 հազար 249-ի համեմատ: Մահվան դեպքերն առաջին վեց ամիսներին 14 հազար 628 են եղել' անցյալ տարվա 14 հազար 772-ի դիմաց: Ամուսնություններն ընթացիկ տարվա կեսին կազմել են 8 հազար 582' նախորդ տարվա 9 հազար 563-ի համեմատ: Ամուսնալուծությունները 1900 են' 2014-ի 2 հազար 469 դեպքի համեմատ»,-ներկայացրեց Կարինե Կույումջյանը' նշելով, որ գրեթե բոլոր ցուցանիշներով նվազում է արձանագրվել անցյալ տարվա նույն ժամանակաշրջանի համեմատությամբ:

Վիճակագրագետի խոսքով' մահացության հիմնական պատճառներն արյան շրջանառության համակարգի հիվանդություններից են' մահվան դեպքերի 49.6 տոկոսը, որոշակի աճ է արձանագրվել նորագոյացություններից մահվան դեպքերի' 20.1 տոկոս, շնչառական հիվանդություններից մահացել է ընդհանուր մահացողների 6.8 և մարսողական օրգանների հիվանդություններից' 6.1 տոկոսը: «Որոշակի աճ ունենք դժբախտ պատահարներից, թունավորումներից և վնասվածքներից մահվան դեպքերի' 4.3 տոկոս, և միայն 1 տոկոսն է, որ կամզում են վարակիչ և մակաբուծային հիվանդություններից մահացողները»,-ասաց Կարինե Կու յումջյանը:

Մանկական և երեխաների մահացության ցուցանշիներն էլ հետևյալն են. «0-1 տարեկան երեխաների մահվան 160 դեպք է գրանցվել' 2014-ի առաջին կիսամյակի 177 դեպքի համեմատ, գրեթե 9.6 տոկոսով նվազել են այդ տարիքի երեխաների մահացության դեպքերը: 1-4 տարեկան երեխաների մահվան դեպքերը եղել են 26: Յուրաքաչյուր 1000 կենդանի ծնվածի հաշվով 10 0-4 տարեկան երեխա է մահացել»,-տեղեկացրեց Կարինե Կույումջյանը: