Կիմ Բալայանն անցումը խորհրդարանական համակարգին քայլ առաջ է համարում դեպի ժողովրդավարություն

Հայաստանի Սահմանադրական դատարանի անդամ Կիմ Բալայանը քայլ առաջ է համարում Սահմանադրության նոր նախագիծը: Նրա խոսքով՝ Սահմանադրության նախագծով առաջարկվում է անցում կատարել կառավարման խորհրդարանական համակարգին, ինչը համապատասխանում է Անկախության հռչակագրի կետերին՝ ի տարբերություն գործող Սահմանադրության: Բացի այդ, Կիմ Բալայանի խոսքով՝ նախագծի ընդունմամբ Հայաստանում ժողովրդավարական կարգերն ավելի ամուր հիմքերի վրա կդրվեն, և գործողության մեջ կդրվի Սահմանադրության ամենաառանցքային դրույթներից մեկը, որ Հայաստանում իշխանությունը պատկանում է ժողովրդին: «Անկախության հռչակագրի երրորդ հոդվածում հստակ նշված է, որ Հայաստանի անունից հանդես գալու լիազորությունները պատկանում են Գերագույն խորհրդին, ուստի կարող ենք ասել, որ 1995թ. Հայաստանի Հանրապետության ընդունած Սահմանադրությունն ապօրինի էր, քանի որ որոշվեց ընդունել կառավարման նախագահական համակարգը՝ անտեսելով Անկախության հռչակագրի դրույթը, որ Հայաստանի անունից հանդես գալու լիազորություննոերը պատկանում են Գերագույն խորհրդին: 2005թ. Սահմանադրությունը փոփոխվեց, սակայն արված փոփոխություններն այդքան էլ էական չէին, քանի որ կառավարման նախագահական համակարգն, ըստ էության, պահպանվեց: Սահմանադրության նոր նախագծով առաջարկվում է անցում կատարել կառավարման խորհրդարանական համակարգին, ինչը ես մեկ քայլ առաջ եմ համարում: Բացի այդ, նոր նախագծով սահմանվում է, որ ժողովուրդը կարող է պետության ներսում ցանկացած հարց հանրաքվեի դնել սեփական նախաձեռնությամբ, եթե հավաքվում է 150 հազար ստորագրություն: Գործող Սահմանադրությամբ նման հնարավորություն ժողովրդին չի տրվում»,- «Արմենպրես»-ի հաղորդմամբ՝ օգոստոսի 31-ին լրագրողների հետ հանդիպմանն ընդգծեց Բալայանը:

Կիմ Բալայանը ներկայացրեց նաև Սահմանադրության նոր նախագծի հետ կապված իր մտահոգությունները: Նախ նա նկատեց, որ սահմանադրական բարեփոխումների մասնագիտական հանձնաժողովը ներկայացրել է ոչ թե բարեփոխումների նախագիծ, այլ Սահմանադրության նոր նախագիծ, քանի որ բարեփոխումների դեպքում պետք է փոփոխություններ կատարվեին գործող Սահմանադրության համապատասխան հոդվածներում: «Հանրապետության նախագահը հանձնաժողովը ստեղծել էր սահմանադրական բարեփոխումների իրականացնելու համար, սակայն ներկայացվել են ոչ թե բարեփոխումներ, այլ բոլորովին նոր Սահմանադրո ւթյուն»,- նշեց Բալայանը:

Սահմանադրական դատարանի անդամը կիսում է մտահոգությունները կապված խորհրդարանական ընտրությունների երկրորդ փուլ անցկացնելու հետ, որը հիմնավորվում է կայուն մեծամասնություն ստեղծելու անհրաժեշտությամբ: «Ընդհանրապես, յուրաքանչյուր երկրի համար կայուն մեծամասնություն ստեղծելը շատ կարևոր նշանակություն ունի՝ ցնցումներից խուսափելու համար, սակայն դրա համար կարիք չկա ընտրությունների երկրորդ փուլ անցկացնել: Ես կարծում եմ, որ դա ավելորդ դրույթ է և կարելի է կայուն մեծամասնություն ստեղծելու այլ տարբերակներ գտնել»,- ընդգծեց նա:

Միևնույն ժամանակ, Կիմ Բալայանը համաձայն չէ հնչող կարծիքների հետ, թե իշխանությունները ցանկանում են փոխել Սահմանադրությունը իրենց վերարտադրությունն ապահովելու համար: Նրա խոսքով՝ եթե իշխանությունները նման նպատակ ունենային, կփոխեին Սահմանադրությունը և ընդամենը այնտեղից կհանեին այն հոդվածը, որն արգելվում է մեկ անձին պաշտոնավարման երկրորդ ժամկետից հետո կրկին առաջադրվել նախագահի պաշտոնում:

Եզրափակելով խոսքը՝ Կիմ Բալայանն ընդգծեց, որ Սահմանադրության նոր նախագծում դրականն ավելի շատ է, քան բացասականը, սակայն նկատեց, որ հարկավոր է քննարկումների արդյունքում հնարավորինս վերացնել առկա թերությունները: Նա նշեց, որ ներկայացված նախագիծը վերջնական չէ. լինելու են առաջարկներ թե' քաղաքական ուժերի, թե' հանրային հատվածի և Սահմանադրական դատարանի անդամների կողմից և կարող են լինել փոփոխություններ: