«Չորրորդ իշխանություն». Ամենաերիտասարդ նախարարները

«Չորրորդ իշխանություն» թերթը գրում է.

«Դեռևս մի քանի օր առաջ ՀՀ բարձրաստիճան պաշտոնյաների, մասնավորապես, նախարարների շարքում կրթության և գիտության նախարար Արմեն Աշոտյանը համարվում էր ամենաերիտասարդ նախարարը: Սակայն օրերս նա հրաժեշտ տվեց այդ կարգավիճակին, քանի որ արդարադատության նախարար նշանակվեց Աշոտյանից երիտասարդ Արփինե Հովհաննիսյանը: Թեման մեզ առիթ տվեց կազմելու նորանկախ պետության մեջ եղած ամենաերիտասարդ նախարարների թոփ սանդղակը:

Օրերս նշանակված արդարադատության նախարար Արփինե Հովհաննիսյանն ամենաերիտասարդն է բոլոր եղածների մեջ: Նրա 32-ը դեռևս չի լրացել, իսկ նա արդեն ղեկավարում է պետության համար ամենառանցքային նախարարություններից մեկը:

Արփինե Հովհաննիսյանի հետ առաջին հորիզոնականները կիսում են բավականին լուրջ գործիչներ:

Այսօր ՀԱԿ խմբակցության պատգամավոր Հրանտ Բագրատյանը, որը ծնվել է 1958թ., 32 տարեկանում արդեն նշանակվել է էկոնոմիկայի նախարար:

32 տարեկանում նախարար է նշանակվել Րաֆֆի Հովհաննիսյանը: Վերջինս ծնվել է 1959թ., իսկ արդեն 1991-1992թթ. նշանակվել է ՀՀ արտաքին գործերի նախարար: Այսօր նա առաջնորդում է «Ժառանգություն» կուսակցությունը, որը ներկայացված է Ազգային ժողովում:

Երիտասարդ տարիքում նախարար է նշանակվել նաև սպարապետ Վազգեն Սարգսյանը: Նա ևս 32 տարեկան է եղել, երբ նշանակվել է պաշտպանության նախարար: Խոսքը սպարապետի՝ առաջին անգամ նախարար եղած ժամանակաշրջանի մասին է: 1959թ. ծնված Վագզեն Սարգսյանը 1991-1992թթ. եղել է պաշտպանության նախարար:

Արմեն Դարբինյանը նույնպես արդեն 32 տարեկանում նախարար է նշանակվել: Վերջինս ծնվել է 1965թ.-ին, և 1997-1998թթ. զբաղեցրել է ֆինանսների և էկոնոմիկայի նախարարի պաշտոնը: 2001թ.-ից մինչև օրս Դարբինյանը Հայ-ռուսական համալսարանի ռեկտորն է:

Նրան հաջորդում է ԿԳ նախարար Արմեն Աշոտյանը՝ ծնված 1975թ.: Նա էլ 2009թ.-ին է նշանակվել նախարար: Նշանակումից շուրջ 2 ամիս անց Աշոտյանը դարձավ 34 տարեկան:

34 տարեկան հասակում բավականին պատասխանատու պաշտոն է ստանձնել այսօր արդեն գլխավոր դատախազ Գևորգ Կոստանյանը: Վերջինս ծնվել է 1977թ.-ին, և արդեն 2011թ.-ին նշանակվել է զինվորական դատախազ:

Նախարարների հիթ շքերթի վերջին՝ 5-րդ հորիզոնականը զբաղեցնում է Դավիթ Հարությունյանը, որը 35 տարեկանում նշանակվել է արդարադատության նախարար»:

Մանրամասն՝ թերթի այսօրվա համարում: