Քաղաքագետը Սերժ Սարգսյանի ելույթը ՄԱԿ-ում տեղին և հիմնավոր է համարում

Հայաստանի Հանրապետությունն իր ռազմական դոկտրինը, ըստ որի, ՀՀ-ն հանդիսանում է Լեռնային Ղարաբաղի Հանրապետության տարածքային ամբողջականության և անվտանգության երաշխավորը, հնարավոր է' ամրապնդի նոր օրենսդրական նախաձեռնություններով: Նման դիտարկմամբ «Արմենպրես»-ի հետ զրույցում հանդես եկավ քաղաքագետ Նարեկ Գալստյանն' անդրադառնալով ՄԱԿ-ում ՀՀ Նախագահ Սերժ Սարգսյանի ունեցած ելույթին:

«Կարծում եմ' տեղին հայտարարություն էր' հաշվի առնելով թե՛ ստեղծված իրավիճակը, թե՛ նաև այս իրավիճակի շարունակական պահպանումը: Դրան նպաստել է նաև Ադրբեջանի պահվածքը միջազգային մակարդակում. որքան էլ նրան կոչ են անում ավելի զուսպ քաղաքականություն վարել, միևնույն է' իր գործողություններով կարողանում է ապտակ հասցնել միջազգային հանրությանը:

Ինչ վերաբերում է նախագահի դիտարկումներին, դրանք տեղին էին, հիմնավոր էին: Առաջին հերթին բխում էին հայկական կողմի ազգային-պետական շահերից և ելնում էին այսօր ստեղծված իրավիճակից: Ես կարծում եմ, որ այսպիսի կոշտ շեշտադրումներով, սկզբունքային պահանջներով հայկական կողմը պետք է ավելի վաղուց հանդես եկած լիներ' դեռ մոտ 3 տարի առաջ, բայց ինչպես ասում են' ավելի լավ է ուշ, քան երբեք»,- ընդգծեց Նարեկ Գալստյանը:

ՀՀ Նախագահ Սերժ Սարգսյանը սեպտեմբերի 29-ին Նյու Յորքում մասնակցել է ՄԱԿ-ի Գլխավոր վեհաժողովի 70-րդ նստաշրջանին, որտեղ հանդես է եկել ելույթով: Ի թիվս այլ թեմաների' Նախագահն անդրադարձել է սահմանային լարվածությանն ու Ադրբեջանի գործողություններին: Նա, մասնավորապես, նշել է, որ Ադրբեջանի ագրեսիվ քաղաքականության շարունակվելու դեպքում Հայաստանին այլ ընտրություն չի մնա, քան իրականացնել անհրաժեշտ իրավական և ռազմաքաղաքական քայլեր՝ ապահովելու Հայաստանի Հանրապետության և Լեռնային Ղարաբաղի Հանրապետության անվտանգությունն ու խաղաղ զարգացումը:

Քաղաքագետի դիտարկմամբ' իրավական քայլերը կարող են իրագործվել նաև միջազգային մեխանիզմների միջոցով, ինչը, սակայն, նա քիչ հավանական է համարում: «Միգուցե հարցը հիմնավորապես դրվի ՀԱՊԿ շրջանակներում քննարկման: Չեմ կարծում, որ այնտեղ այս հարցը լուծում ստանա, այսինքն' ՀԱՊԿ-ից չի կարելի ակնկալել ինչ-որ իրական գործուղություններ: Միգուցե քննարկում կլինի, ինչ-որ կոչեր կհնչեն, պահանջներ' ուղղված Ադրբաջանին, բայց, հաշվի առնելով ՀԱՊԿ անդամ երկրների շահերի տարբերությունները, Ադրբեջանի ու Հայաստանի հետ հարաբերությունների բնույթը, չեմ կարծում, որ ՀԱՊԿ-ն գործուն մասնակցություն կունենա»,- նշեց քաղաքագետը' միևնույն ժամանակ հավելելով, որ թե՛ ՀԱՊԿ-ն, թե՛ Ռուսաստանը պարտավորություններ ունեն Հայաստանի հանդեպ, քանի որ Ադրբեջանի սադրիչ գործողությունները հասել են արդեն Հայաստանի Հանրապետության սահմաններ: «Դա ագրեսիա է, ու ՀԱՊԿ-ն պետք է արձագանքի, ընդունի, որ տեղի ունեցողն ագրեսիա է, և ինչ-որ գործողություններ իրականացնի, բայց դա իդեալական տարբերակն է: Ռազմաքաղաքական մեխանիզմները, որոք Նախագահը հիշատակել է իր ելույթում, կարծում եմ' մեզ արդեն հայտնի էին, որովհետև մինչ ՄԱԿ- ի ամբիոնից դա հայտարարելը, արդեն այստեղ էլ հայտարարվել էր կոշտ արձագանքի մասին»,- ավելացրեց Նարեկ Գալստյանը:

Նրա խոսքով' հայկական կողմը պատրաստ է և պատրաստվում է կիրառել ավելի կոշտ պատժիչ ու կանխարգելիչ գործողություններ: «Հավանաբար, հայկական կողմը որոշակի մարտավարական փոփոխությունների կդիմի իր դիրքերը «ոչ պատերազմ, ոչ խաղաղություն» իրավիճակում էլ ավելի ամրապնդելու համար' արդեն բուն ռազմական տեսանկյունից»,- նշեց քաղաքագետը: