Իտալիայում բացահայտվել է բնակարանային գողությամբ զբաղվող վրացական հանցախումբ

Իտալիայում ձերբակալվել է բնակարանային գողությամբ զբաղվող 33 հոգանոց վրացական հանցախումբ, հաղորդում է Грузия Online–ը։

Իտալիայի ոստիկանության ձեռնարկած «Դանկո» հատուկ գործողությունների արդյունքում բացահայտված հանցախմբի մոտ հայտնաբերվել է 5կգ ոսկյա զարդեր, մոտ մեկ միլիոն եվրո արժողությամբ թանկարժեք քարեր և 150 հազար եվրո կանխիկ գումար։ Խուզարկության ընթացքում հայտնաբերվել են դռների փականներն առանց վնասելու բացող սարքեր։ Ըստ ոստիկանության՝ վրացական հանցախումբն այնքան «մաքուր է գործել», որ տուժողների գրեթե 90%–ը կարծել է, որ իրենք են մոռացել փակել բնակարանի դուռը։ 

Հանցավոր խմբին անդամակցել են նաև հինգ իտալացիներ և մի քանի մոլդովացիներ։ Ոստիկանության ձեռնարկած մասշտաբային երեք հատուկ գործողությունների արդյունքում ձերբակալվել է հանցավոր բանդայի մոտ 150 անդամ, որոնց մոտ խուզարկության ժամանակ հայտնաբերվել է մոտ 10 միլիոն արժողությամբ տարբեր իրեր։