Քաղաքականացված ներդրումներ...

Վարչապետ Կարեն Կարապետյանը նախընտրական հանդիպումներում հայտարարում է, որ առաջիկա տարիներին Հայաստանում 3,2 միլիարդ դոլարի ներդրում են ակնկալում, որից 840 միլիոն դոլարը՝ այս՝ 2017 թվականի ընթացքում: Վստահաբար, հենց ներդրումների թեման էլ քարոզարշավում դառնալու էր ՀՀԿ-ի ասելիքը, տեսեք՝ մենք այսքան ներդրումներ ենք բերելու եւ այլն: Բայց եթե հանկարծ հարցնենք, թե գործունեության յոթ ամսում քանի՞ ներդրում է Հայաստան բերել կառավարությունը, դժվար թե կարողանան այդ հարցին պատասխանել:

Ինչ խոսք, ներդրումները մեր տնտեսությանը օդի և ջրի պես են անհրաժեշտ: Սակայն ողջ խնդիրը կայանում է նրանում, որ այս 3 միլիարդ դոլարի ներդրումների մասին խոստումները, բացարձակ ոչնչով հիմնավորված չեն: Եթե հիմնավորված լինեին, կամ գոնե հավատացող լիներ նման հեռանկարների, մեր երկրում արդեն այսօր՝ տնտեսական բումի ականատեսը կդառնայինք: Նորմալ երկրում, եթե պարզ է դառնում, որ ինչ-որ հեռանկարներ են բացվում՝ դա անմիջապես ազդում է ընդհանուր գործարար ակտիվության վրա:

Մեզ մոտ նման բան չի կատարվում, հակառակը՝ ապատիա է, թերահավատություն, ինչը նշանակում է, որ այդ խոստումներին մեր ժողովուրդը և մեր բիզնես աշխարհը մոտենում է շատ իրատեսորեն: Ըստ կառավարության՝ ներդրումների պակասի մեղավորն են Լարսի հաճախ փակումը, սահմանային լարված իրավիճակը, Ռուսաստանի տնտեսական անկումը: Երբ այս տեսանկյունից ես նայում ներդրումների պակասին, ուրեմն չես գիտակցում ամբողջ խորությունը եւ չես պայքարում խոչընդոտների դեմ:

Ներդրումների մասին խոստումների ֆոնին Տնտեսական զարգացման եւ ներդրումների նախարար Սուրեն Կարայանը հայտարարել է, որ մարտի վերջին ռուսաստանաբնակ մի խումբ հայ գործարարներ կգան Հայաստան եւ հայտարարություն կանեն ներդրումներ անելու մասին: Այդ գործարարները մոտ երեք տասնյակ էին, ամենահարուստ հայի՝ միլիարդատեր Սամվել Կարապետյանի գլխավորությամբ: Անշուշտ, այս ներդրումները, որոնք լավագույն դեպքում կկազմեն 130-150 միլիոն դոլար, դժվար թե էականորեն նպաստեն մեր տնտեսության զարգացմանը, սակայն, ինչ խոսք՝ լուրջ հենք կդառնան Կարապետյանի դիրքերի ամրապնդման համար: Անկասկած է, որ հաշվարկը նախընտրական էֆեկտն է, որ ներդրումների մասին հայտարարությունները կթողնեն ապրիլի 2-ին քվեարկության գնացող քաղաքացիների մի մասի վրա:

Կարեն Կարապետյանի հետագա քաղաքական ճակատագիրը դեռևս հստակ չէ, այդ դեպքում «վերապրելու» համար այլ բան չի մնում, քան իրավիճակը հավասարակշռել ներդրումներով՝ փոխելով տնտեսական վիճակը, ինչը էական դեր կարող է խաղալ իշխանության հարաբերակցությունը փոխելու համար: Այդ տեսանկյունից, ռուսաստանցի գործարարների ներդրումների բուն գործառույթն, իհարկե, հետընտրական է, որով նրանք Կարեն Կարապետյանի համար կամ «կնվաճեն» 2018-ի վարչապետի պաշտոնը:

Ստելլա ԽԱՉԱՏՐՅԱՆ