Դատարկաբանում են՝ խնդիրները թողնելով չլուծված

Երեկ «Հոգեկան առողջության վերականգնման հայկական ասոցիացիա» հասարակական կազմակերպությունը հրավիրել էր ասուլիս՝ բարձրաձայնելու ՀԿ-ի 300 շահառուների թիվ մեկ գերխնդիրը: Ասուլիսին ներկա ՀԿ-ի ղեկավարն ու շահառուների հարազատները խոսում էին այն  մասին, որ պետությունը դադարեցրել է հոգեկան առողջության խնդիրներ ունեցողներին Զիպրեքսիա դեղի անվճար մատակարարումը: Նրանք նշում էին, որ Զիպրեքսիան միակ դեղն է, որը դրական ազդեցություն է թողնում նման խնդիրներով մարդկանց վրա և շնորհիվ Զիպրեքսիայի՝ հոգեկան առողջության խնդիր ունեցողները մոռացել են հոգեբուժարաններում բուժվելու մասին:

Չնայած այս փաստին՝ Առողջապահության նախարարությունը դադարեցրել է Զիպրեքսիա դեղի անվճար մատակարարումը՝ փոխարենն առաջարկելով այլ դեղամիջոց:

Ըստ շահառուների հարազատների՝ տրամադրվող նոր դեղամիջոցը՝  Օլանզապինը, տալիս է հակառակ էֆեկտ և այն օգտագործող հիվանդներն ավելի վատ վիճակում են հայտնվում, ուստի  խնդրում են, որ Առողջապահության նախարարությունը շարունակի Զիպրեքսիայի անվճար տրամադրումը:

Սա շատ լուրջ խնդիր է՝ հաշվի առնելով, որ նման խնդիրներով շատ քաղաքացիներ չեն բուժվում հոգեբուժարաններում, փակված են իրենց տներում, և եթե որակյալ Զիպրեքսիան նրանց օգնում է լիարժեք և անվտանգ կյանք վարել, ապա պետությունը պարտավոր է նրանց այս դեղը տրամադրել: 

Խնդրի հրատապությունն ու լրջությունը կարևորելով՝ թվում էր, որ ՀՀ ԱՆ-ն օպերատիվ կարձագանքի այս խնդրին՝ փորձելով լուծումներ գտնել: Մինչդեռ ի պատասխան բարձրաձայնված խնդրի՝ այսօր Առողջապահության նախարարությունը հրապարակեց անիմաստ բովանդակությամբ մի հերքում՝ նշելով, որ Ապոտեքս դեղագործական ընկերության արտադրության Օլանզապինը համապատասխանում է ՀՀ-ում ընդունված նորմատիվային փաստաթղթային և լաբորատոր պահանջներին: 

Հարգելինե՛րս, ոչ ոք չի ասել, որ այս դեղը ժամկետանց է կամ չի համապատասխանում ՀՀ-ում ընդունված նորմատիվային փաստաթղթային և լաբորատոր պահանջներին: Հոգեկան առողջության խնդիր ունեցողի հարազատին մեկ բան է հետաքրքրում, որ օգտագործած դեղը տա արդյունք, ինչն իրենք չեն տեսնում Օլանզապինի ընդունման պարագայում, իսկ Զիպրեքսիա չեն կարող գնել, քանի որ շատ թանկ է: Սա էր այն միակ հարցը, որը բարձրաձայնվեց և որը պահանջում է հրատապ լուծում, քանի որ այս պահին այդ լուծումից է կախված 300 քաղաքացու հետագա կենսագործունեությունը:

Այս հարցին լուծում տալու և գործնական քայլ կատարելու  փոխարեն՝  Առողջապահության նախարարությունն այլ բանով է զբաղվում: Հավանաբար՝ չեն ընկալել խնդրի բուն էությունը և հրապարակել են մի բան, որն ըստ էության, որևէ հարցին լուծում չի տալիս, իսկ հոգեկան առողջության խնդիրներն իրենց մաշկի վրա զգացող հարազատների ահազանգն էլ մնում է օդում առկախված: 

Աղավնի Սուքիասյան