Եվրոպայի լավագույն խաղացողներից մեկը ձերոնցից է, լավ արդյունքներ կարող եք ունենալ. ՈւԵՖԱ-ի նախագահը՝ Հայաստանում

ՈւԵՖԱ-ի նախագահ Ալեքսանդր Չեֆերինը մեկօրյա այցով ժամանել է Հայաստան:

Այսօր Չեֆերինը եղել է Վաղարշապատում, որտեղ ՀՖՖ նախագահ Ռուբեն Հայրապետյանի հետ ներկա է եղել Վաղարշապատի ֆուտբոլի ակադեմիայի խորհրդանշական արարողությանը:

Միջոցառմանը ներկա է եղել ՀՀ նախագահ Սերժ Սարգսյանը:

Քիչ առաջ ՈՒԵՖԱ-ի նախագահն այցելել էր նաև ՀՖՖ Տեխնիկական կենտրոն/Ֆուտբոլի ակադեմիա: Այս մասին տեղեկացնում է ԼՈւՐԵՐ.com-ի թղթակիցը:

Ակադիեմիայում Չեֆերինը ՀՖՖ նախագահ Ռուբեն Հայրապետյանի հետ շրջայց կատարեց և ծանոթացավ ակադեմիայի ենթակառուցվածքներին:

ՀՖՖ նախագահ Ռուբեն Հայրապետյանը լրագրողների հետ զրույցում նշեց, որ ՈւԵՖԱ-ի նախագահի հետ քննարկել է մանկապատանեկան ֆուտբոլի, ընդհանուր ֆուտբոլի զարգացման մասին խնդիրները:

«Ազգային լիգան ուժեղացնելու խնդիրները ՈւԵՖԱ-ի նախագահի հետ չէ, որ պետք է քննարկենք: Դա մեր ներքին խնդիրներն են և մենք ինքներս պետք է լուծենք: Ազգային լիգան ուժեղացնելու համար ՈւԵՖԱ-ի նախագահը մեզ հաստատ օգնական չէ: ՈւԵՖԱ-ի նախագահի հետ քննարկվել է բազմաթիվ խնդիրներ, մանկապատանեկան ֆուտբոլի, ընդհանուր ֆուտբոլի զարգացման մասին խնդիրները»,- ասաց ՀՖՖ նախագահը:

«Եկել եմ Հայաստան՝ իմ աջակցությունը ցույց տալու ՀՖՖ-ին, որը շատ լավ հարաբերությունների մեջ է ՈՒԵՖԱ-ի և անձնապես ինձ հետ»,- ասաց Չեֆերինը:

Խոսելով Հայկական ֆուտբոլի խնդիրների մասին՝ ՈՒԵՖԱ-ի նախագահն ասաց.

«Բոլոր տեղերում էլ խնդիրը ենթակառուցվածքներն են: Դուք ունեք տաղանդներ, սակայն ենթակառուցվածքները միշտ էլ խնդիր են: ՈւԵՖԱ-ն ներդրումներ է կատարում, ակնհայտորեն ֆեդերացիան ջանք չի խնայում, բայց դեռ անելիքներ կան: Եթե երեխաները չունենան խաղալու տեղ՝ չեն կարող ֆուտբոլիստ դառնալ:

Համոզված եմ, որ ճիշտ ճանապարհին եք և լավ գործ եք անում: Բայց, եթե ակումբների բյուջեները խնդրահարույց են, ապա ֆեդերացիան չի կարող հրաշքներ գործել: Կարևորը երեխաների և երիտասարդների հետ աշխատելն է, ֆուտբոլը զարգացնելն է: Եվրոպայի լավագույն խաղացողներից մեկը ձերոնցից է: Ակնհայտորեն լավ արդյունքներ կարող եք ունենալ»:

Կոռուպցիայի դեմ պայքարի մասին խոսելիս՝ ՈՒԵՖԱ-ի նախագահը նշեց.

«ՈւԵՖԱ-ն առնաձնապես կոռուպցիայի մեջ ներգրավված չի եղել, որքանով տեղյակ եմ: Դա ՖԻՖԱ-ին հատուկ իրողություն է: Իհարկե, դատապարտում ենք կոռուպցիան»: