Ադրբեջանից հազարավորները մեկնել են մարդ մորթելու արվեստը սովորելու. թիրախ կարող ենք լինել. Սարգիս Հացպանյան

Ամենայն Հայոց Կաթողիկոս Գարեգին Բ-ն պատրաստակամություն է հայտնել հանդիպելու Կովկասի մահմեդականների վարչության նախագահ, Շեյխ ուլ-իսլամ Ալլահշուքյուր Փաշազադեի՝ հետ: Ամենայն Հայոց Կաթողիկոսը նշել է, որ Ադրբեջանի հոգևոր առաջնորդ Ալլահշուքյուր Փաշազադեի հետ հանդիպումը նպաստելու է Արցախի հակամարտության խաղաղ կարգավորմանը: 

ԼՈւՐԵՐ.com-ի հետ զրույցում Տարածաշրջանային հարցերով փորձագետ, վերլուծաբան Սարգիս Հացպանյանը դրական որակեց հոգևոր առաջնորդների՝ վերը նշված հանդիպումը՝ այն համարելով նաև պատմական երևույթ. «Հազարից մեկ է նման բան պատահում, երբ հոգևորականները հավաքվում և խաղաղությանը միտված  զրույց են ունենում: Կարևոր չէ, թե ինչ արդյունքներ կլինեն, այս հանդիպումն արդեն իսկ շատ դրական է: Մենք իսլամական աշխարհում խնդիր չունենք, պետք էլ չէ, որ ունենանք, բայց պետք է նշեմ, որ սիրիական աշխարհում ահաբեկչական կազմակերպությունների թիրախը մենք կարող ենք լինել: Մեր տարածքը շատ փխրուն իրավիճակում է՝ հատկապես Նախիջևանի տարածքը: Չպետք է մոռանանք, որ Ադրբեջանից հազարավորները մեկնել են իսլամական պետությունում մարդ մորթելու արվեստը սովորելու, և Գարեգին Բ-ի հետ Փաշազադեի հանդիպումը կարող է մեղմացուցիչ հանգամանք լինել՝ մեզ հեռու պահելով այդ վտանգից»:

Սարգիս Հացպանյանի համոզմամբ՝ այս հանդիպման հետևանքները մի կողմ դրած, սակայն, Գարեգին Բ-ին հակացուցված է որևէ բանում հաջողության հասնել. «Եկեք հիշենք Վրաստանի և Ռուսաստանի հոգևոր առաջնորդների հետ նրա հանդիպումները, որոնք որևէ դրական արդյունք չտվեցին: Նա, ում հետ հանդիպում է, մեզ որևէ օգուտ չի կարողանում բերել: Հիշեք՝ ինչպես Արամ Աթեշյանին հրավիրեց Հայաստան, և  մինչ օրս այդ հարցը մնում չլուծված: Կարճ ասած՝ պետք է նշեմ, որ Գարեգին Բ-ի մոտ ոչինչ չի ստացվում, որովհետև նա իր տեղում չէ»: 

Ալլահշուքյուր Փաշազադեն նաև անդրադարձել է հայկական կողմի ջանքերով Շուշիի մզկիթի վերականգնման իրողությանը, նշել, որ հայերը դա անում են սադրիչ նպատակներով: Ընդվզելով հայերի այս քայլի դեմ' Շեյխ ուլ-իսլամը տեղեկացրել է, որ հարցը բարձրացնելու է Մոսկվայում ԱՊՀ երկրների Միջկրոնական խորհրդի նիստին:

Ըստ մեր զրուցակցի՝ Ալլահշուքյուր Փաշազադեն, թեև էթնիկ ադրբեջանցի է, բայց ներկայացնում է նախկին ԱՊՀ տարածքների մահմեդականների շահերը, նրանց հոգևոր առաջնորդն է և անիմաստ է նրա քննադատությունը՝ մեր կողմից Շուշիի մզկիթի վերակառուցման վերաբերյալ. «Շուշիի մզկիթն իրանական մզկիթ է, մենք դրան երբեք ձեռք չենք տվել, պահպանել ենք, այն պետք է վերանորոգվի, և մեր այս քայլը ողջունվել է Իրանի կողմից, հիմա, եթե նա սա սադրանք է որակում, մեզ համար դա որևէ բան չի նշանակում, քանի որ մենք ունենք հարևան Իրանի աջակցությունն՝ այս հարցում»: 

Աղավնի Սուքիասյան