Ալիևը նոր թակարդ է լարում...

Եվրամիության հետ Ադրբեջանի նոր համաձայնագրում ամենակարևորն այն է, որ Միությունը բավական հստակ աջակցություն է ցուցաբերում Ադրբեջանի տարածքային ամբողջականությանն ու ինքնիշխանությանը, անկախությանն ու անձեռնմխելիությանը, միջազգայնորեն ճանաչված սահմաններին․

Արևելյան գործընկերության և Վիշեգրադյան քառյակի արտգործնախարարների հանդիպմանը այսպիսի հայտարարություն է արել Ադրբեջանի արտաքին գործերի նախարար Էլմար Մամեդյարովը: Նա նշել է, որ երկկողմ համաձայնագրի շուրջ բանակցությունների մեկնարկը Ադրբեջանի նախագահ Իլհամ Ալիևի բրյուսելյան այցի ընթացքում նոր էջ է բացել երկկողմ հարաբերություններում։

Փաստացի հայտարարվում է, որ սկսվում է ԵՄ-Ադրբեջան ակտիվ բանակցությունների նոր փուլը: Դրան զուգահեռ հետաքրքիր զարգացումներ են ռուս-ադրբեջանական հարաբերություններում, որտեղ, հնարավոր է` Բաքվին չի բավարարում Կրեմլի կողմից տրված շահեկան պայմանները, ուստի Ադրբեջանի դիկտատորը ամեն կերպ փնտրտուքների մեջ փորձում է ընտրություն կատարել կողմերի տրված պայմանների միջև և շահարկել կողմերին իր ընտրությամբ։

Բաքվի այս դեգերումները անշուշտ մեզ քիչ են վերաբերվում և հետաքրքրում, մինչդեռ ԵՄ դիրքորոշման մեջ նկատվող փոփոխությունները մտածելու տեղի են տալիս: ՀՀ հետ բանակցությունների ընթացքում ԵՄ երբևե չի շեշտել՝ մեր տարածքային ամբողջականությանը կամ գոնե ազգերի ինքնորոշմանը վերաբերվող դրույթները:

Կարծես թե, մեր հարաբերությունները ԵՄ հետ կառուցվել են տնտեսական գործընկերության համատեքստում և ԵՄ երբեք չի դիտարկվել իբրև քաղաքական գործընկեր: Ընտրություններից հետո ԵՄ արձագանքը ևս ուշագրավ է: Բազմիցս հայտարարվել էր, որ ԵՄ-ՀՀ հարաբերությունների հետագա զարգացումը մեծապես կախված է լինելու ընտրությունների որակով: Թերևս մեր ընտրությունների որակը չի բավարարել եվրոպական գործընկերներին և արդյունքում ԵՄ որոշում է կայացրել տարածաշրջանում հենվել Ադրբեջանի այլ ոչ թե ՀՀ հետ հարաբերությունների զարգացման վրա:

Մյուս կողմից դժվար է պատկերացնել, որ ԵՄ-ն հեշտությամբ կհրաժարվի ՌԴ ազդեցության գոտուց Հայաստանին դուրս բերելու իր անթաքույց ցանկությունից: ՀՀ արևմտականացումը ՌԴ-ին դուրս կմղի Հարավային Կովկասից՝ ինչը կնշանակի արևմուտքի ռազմավարական շահերի իրագործում:

Ստելլա ԽԱՉԱՏՐՅԱՆ