Բա ի՞նչ էիք կարծում

Այն, որ Հայաստանում Ազգային ժողովի դերը մշտապես եղել է չգնահատված, լիովին չբացահայտված, այն, որ մեզանում լիարժեքորեն երբևիցե չի գիտակցվել պառլամենտի կարևորությունը, որպես այդպիսին, նորություն չէ: Ոմանք այս տխուր իրողությունը պայմանավորում են պետական խորն ավանդույթների բացակայությամբ, ոմանք էլ այլ բաներով: Թե կոնկրետ ինչով է սույն իրողությունը պայմանավորված, անկասկած, դժվար է ասել, բայց որ այստեղ ոչ պակաս դեր է խաղում նաև մարդկային գործոնը, ոչ ոք չի կարող ժխտել. ակնհայտ է, որ ԱԺ անարդյունավետ աշխատանքի հիմքում իրականում հենց սույն հանգամանքն է ընկած, ինչը, սակայն, դատելով որոշ պատգամավորների հնչեցրած չափազանց ինքնավստահ հայտարարություններից, ոչ բոլորն են ցանկանում խոստովանել:

Խոսրով Հարությունյանն, ով ԱԺ հնաբնակներից մեկն է, և ով 6-րդ գումարման Ազգային ժողովում ևս կունենա միայն իրեն հատկացված աթոռը, չափազանց ջերմորեն է արտահայտվել 5-րդ գումարման Ազգային ժողովի մասին ու որպես դրա արդյունավետության ապացույց մատնանշել մի քանի օրենքներ, որոնք ընդունել է այդ կառույցը իր գործունեության վերջին տարիների ընթացքում:

Իհարկե, ոչ ոք, կարծում ենք, իրավունք չունի քննադատելու Հարությունյանի անձնական նախասիրությունները, սակայն հարցերը, որ առաջանում են այս ամենի հետ կապված, մի քանիսն են:

Առաջին՝ հատկապես ինչպե՞ս կարող է Խոսրով Հարությունյանն օբյեկտիվորեն ապացուցել, որ 5-րդ գումարման Ազգային ժողովը բացառիկ է եղել իր արդյունավետությամբ. հատկապես որո՞նք են սույն պնդման օբյեկտիվ հիմքերը: Երկրորդ՝ որո՞նք են այս կառույցի կողմից ընդունված այն օրենքները, որոնք էականորեն թեթևացրել են շարքային քաղաքացու կյանքը (ակնհայտ է, որ ասենք Հարությունյանի կողմից որպես օրինակ բերված Հարկային օրենսգիրքը այդպիսին չի կարող համարվել, քանի որ այն միջազգային համապատասխան կառույցի պարտադրանքով ընդունված նախագիծ է, որը նախևառաջ կոչված է ծառայել միջազգային համապատասխան ֆինանսական կառույցի շահերին ու հետո միայն իբր տեղացիներիս): Երրորդ՝ եթե ԱԺ-ն իրոք արդյունավետ է գտնվել, ապա ինչո՞ւ է վերջին տարիներին Հայաստանը բացառապես անկում ապրել բառացիորեն բոլոր հիմնական ցուցանիշներով՝ տնտեսական, դեմոգրաֆիական և այլն:

Եվ ուրեմն՝ բնական հետևություն՝ Հարությունյանի բարձրագոչ պնդումը 5-րդ գումարման Ազգային ժողովի վերաբերյալ, բացարձակապես մերկապարանոց է ու յուրատեսակ փիառի տարրեր է պարունակում. բոլոր չափորոշիչներով՝ 5-րդ գումարման ԱԺ-ն չի համապատասխանել անգամ ամենաաննշան ստանդարտներին՝ սա ի գիտություն Խոսրով Հարությունյանի:

Դավիթ ԲԱԲԱՆՈՎ