Արթուր Դավթյանը պետք է արձագանքի ու քրեական գործ հարուցի

«Նաիրիտ» գործարանի աշխատակիցներն այսօր կրկին Կառավարության դիմաց էին: Նրանց պահանջն է դադարեցնել գործարանի լուծարման գործընթացը, որը սկսվել է դատական կարգով սնանկ ճանաչելուց հետո: Նշենք, որ գործարանը արագացված կարգով սնանկ է ճանաչվել գործարար Սամվել Կարապետյանին պատկանող ՀԷՑ-ի հայցի հիման վրա: 

ԼՈւՐԵՐ.com-ի հետ զրույցում համակարգող խմբի անդամ Կարինե Շահվերդյանը տեղեկացրեց, որ պատրաստվում են դիմել ՀՀ գլխավոր դատախազություն՝ գործարանում տեղի ունեցած թալանի պատասխանատուներին պատասխանատվության ենթարկելու պահանջով: 

«Մենք ներկայացրել ենք հիմնականում 2 տվյալ, ըստ որի ներկայացնում ենք, որ շորթումներ են եղել։ Խնդրել ենք այն ընդունել որպես հայտարարություն և համարել հիմք՝ քրեական գործ հարուցելու, մեղավորներին բացահայտելու և պատժելու համար»,- շեշտեց գործարանի նախկին աշխատակիցը:

Նրա խոսքով՝ վաղը Շենգավիթ վարչական շրջանի ընդհանուր իրավասության դատարանում տեղի կունենա նախկին աշխատակիցների հերթական դատական նիստը, որից հետո իրենք դատախազությանը կփոխանցեն դիմումը: Շահվերդյանը նշեց, որ արդեն 150 ստորագրություն է հավաքվել և բոլոր ստորագրողներն էլ իմացել են, թե ինչի տակ են ստորագրում: 

• Ի դեպ՝ նաիրիտցիները ևս մեկ անգամ էին դիմել այն ժամանակ Գլխավոր դատախազ Գևորգ Կոստանյանին, ներկայացրել, որ իրենց ստորացուցիչ պայմանագրեր են ստիպել ստորագրել և պահանջում էին համապատասխան ընթացք տալ գործին: Սակայն դատախազությունն այդպես էլ հանցակազմ չգտավ, որի համար կարող էր իրավական ընթացակարգ սկսել: 

Այժմ ՀՀ գլխավոր դատախազ Արթուր Դավթյանից պահանջում են քրեական գործ հարուցել, պարզել «Նաիրիտ»-ում իրականացված թալանի մեղավորներին ու պատժել: Թե ինչ արձագանք կստանան կամ ինչ սպասելիքներ կան դատախազից, նաիրիտցիները գերադասում են այս պահին չխոսել, մինչև գործնական քայլեր Դավթյանի կողմից չտեսնեն: 

Քրիստինա Աղալարյան