«Իրատես». Ամենահուզող հարցը. որտե՞ղ է լինելու Սերժ Սարգսյանը 2018-ից հետո. հետաքրքիր լուծում են գտել

«Իրատես» թերթը գրում է.

«Խորհրդարանական ընտրություններից հետո Երևանի ավագանու ընտրություններին պատրաստվող քաղաքական ուժերին հետաքրքրում է ոչ այնքան առկա դասավորությունների հարցը, որքան այն, թե ինչ պատկեր կլինի իշխանությունում 2018-ից հետո: Այսինքն, ճիշտ այն ժամանակ, երբ կավարտվի նախագահի լիազորությունների ժամկետը, իսկ երկիրը լիովին «կմխրճվի» կառավարման խորհրդարանական համակարգի մեջ:

Այս համատեքստում և շարքային քաղաքացիներին, և քաղաքական գործիչներին հուզում է մեկ հարց որտե՞ղ է լինելու Սերժ Սարգսյանը: Այստեղից ծագում է նաև ենթահարց՝ Կարեն Կարապետյանը կմնա՞ իր տեղում:

Մեր տեղեկություններով, այս օրերին իշխանությունում հետաքրքիր սցենար են մտածում, որպեսզի երկրի և առաջին, և երրորդ դեմքերը գոհ մնան: Ըստ այդ նոր դասավորության, Սերժ Սարգսյանը, ինչպես հայտարարել է, չի հեռանա իշխանությունից ու քաղաքականությունից, կլինի վարչապետի պաշտոնում: Այդ դեպքում որտե՞ղ կլինի Կարեն Կարապետյանը:

Հարցին հետաքրքիր պատասխան եղավ' էլի վարչապետ, մեկ տարբերությամբ՝ այս անգամ փոխվարչապետ: Նա լինելու է Սերժ Սարգսյանի առաջին տեղակալը, պատասխանատու է լինելու տնտեսական բարեփոխումների համար: Այսպիսով, նրան հնարավորություն է ընձեռվելու հայտարարված բոլոր բարեփոխումներն ու ծրագրերը անմիջականորեն իրականացնելու: Իսկ Սերժ Սարգսյանը, ինչպես ասել էր, հետամուտ է լինելու երկրի անվտանգության ապահովմանը:

Հենց այնպես չէր ընտրված նախընտրական կարգախոսը՝ «Անվտանգություն և առաջընթաց», այսինքն, կողք կողքի են լինելու անվտանգությունը (Սերժ Սարգսյան) և առաջընթացը (Կարեն Կարապետյան)»:

Մանրամասները՝ թերթի այսօրվա համարում: