Պայքար քաղաքապետի պաշտոնի համար. Փաշինյանը հոլովակ է նկարահանում (տեսանյութ)

ԵԼՔ դաշինքի՝ Երևանի քաղաքապետի թեկնածու Նիկոլ Փաշինյանը կրկին երգում է: Նախորդ անգամ, Երևանի հիմնը կատարելիս՝ Փաշինյանն արժանացավ քննադատությունների. ՀՀԿ փոխնախագահ Արմեն Աշոտյանը նրա կատարումը որակել էր ֆալշ, այնուամենայնիվ, այսօր Փաշինյանը հոլովակ է նկարահանում նույն այդ «Էրեբունի-Երևան» երգի հիման վրա:

Ինչպես նշում է Նիկոլ Փաշինյանը, հոլովակի նկարահանումների համար, խորհրդակցության արդյունքում, ընտրել են Թամանյանի արձանի ֆոնը, քանի որ հոլովակ նկարահանելը ծախսեր է պահանջում:

«Քաղաքապետի պաշտոնում, իմ գործունեությամբ, ամեն ինչ պետք է անեմ, որ մեծագույն հարգանքի տուրք լինի Ալեքսանդր Թամանյանին, Երևան քաղաքի լավագույն քաղաքապետերին և երևանցիներին»,- ասաց նա:

Փաշինյանը կատակեց՝ ռեժիսորները զուսպ են գտնվել և իր հրաշալի կատարմամբ ընդամենը մեկ նախադասություն է լինելու. «Իհարկե, ես դեմ եմ ռեժիսորական նման ինքնիրավչությանը, բայց՝ ինչ արած...: Չնայած՝ դրա պատճառն այն է, որ մեր թիմից մեծ թվով ներկայացուցիչներ են հոլովակում ներկայանում»:

Նրա խոսքով՝ գաղափար է ծնվել, որ ուղիղ եթերի կադրերը օգտագործվեն նաև հոլովակի մեջ. «Երգի ձայնային տարբերակը պատրաստ է և անհավատալի լավ է ստացվել: Շատ կարևոր է, որ Երևան քաղաքի հիմնը բոլորի համար դառնա երգեցողության առարկա, որովհետև հիմնի կատարման էությունն այն է չէ, թե ով ինչպես է երգում, այլ այն, որ բոլոր քաղաքացիները երգեն և հիմնը լինի իրենց հոգու մեջ, լինի կյանքի ուղեկիցը և դառնա քաղաքի ծաղկման և նոր շունչ ստանալու սիմվոլը»,- ընդգծեց նա:

Փաշինյանը նշեց, որ հոլովակը հանրության դատին կհանձնվի առաջիկա շաբաթվա ընթացքում: