Ապրիլյան պատերազմի հերոս Քյարամ Սլոյանն այսօր կդառնար 21 տարեկան (տեսանյութ)

Այսօր Ապրիլյան պատերազմում զոհված Քյարամ Սլոյանի ծննդյան օրն է: Հերոսը կդառնար 21 տարեկան:

Քյարամ Սլոյանը ծառայել է կապիտան Արմենակ Ուրֆանյանի հրամանատարությամբ: Ապրիլյան պատերազմի օրերին Քյարամ Սլոյանն իր զինակիցների հետ միասին կարողացել է երկու անգամ հետ մղել հակառակորդի գրոհը։ Ադրբեջանական հատուկ ջոկատայինների գերազանցող ուժերի ճնշման տակ կապիտան Արմենակ Ուրֆանյանը անձնակազմին հրամայել է հեռանալ առաջնագծից, սակայն շարքային Քյարամ Սլոյանը, չենթարկվելով հրամանատարի հրամանին, շարունակել է պաշտապանական մարտը, գնդացրով ոչնչացրել մեր թշնամիներին, ցավոք, զոհ դառնալով նաև ինքը։

Քյարամ Սլոյանը հետմահու պարգևատրվել է Հայաստանի Հանրապետության Մարտական խաչ առաջին աստիճանի շքանշանով:

Քյարամ Սլոյանը ծնվել էր 1996 թվականի ապրիլի 27-ին՝ ՀՀ Արագածոտնի մարզի Արտաշավան գյուղում՝ եզդիների ընտանիքում։ 2014թ.-ին անցել է ծառայության՝ Արցախի Հանրապետության Պաշտպանության բանակում, եղել է Մարտակերտի շրջանի Թալիշ գյուղի ինքնապաշտպանական մարտերի մասնակից։