Հրաչյա Հարությունյանը ողնաշարի և սրտի հետ կապված խնդիրներ ունի

Ապրիլի 25–ին պաշտոնապես հայտարարվեց, որ Տամբովի բանտից Հայաստան կարտահանձնվի 6 տարի 9 ամիս ազատազրկման դատապարտված Հրաչյա Հարությունյանը:

«ՀՀ իշխանությունները, Արդարադատության նախարարությունը հետևողական ջանքեր են գործադրել դատապարտյալի փոխանցման խնդրի լուծման ուղղությամբ և ներկայում Հրաչյա Հարությունյանի՝ Հայաստան փոխանցելու հարցում ֆինանսական պարտավորությունների առկայության խոչընդոտը վերացված է»,– ասել էր արդարադատության փոխնախարար Վիգեն Քոչարյանը:

ԼՈւՐԵՐ.com-ի թղթակիցի հետ զրույցում Հրաչյա Հարությունյանի կինը՝ Անահիտն ասաց, որ իրենք ոչ մի տեղեկություն չեն ստանում ամուսնու մասին: «Մենք էլ ենք հեռուստացույցով լսել, որ մինչև երկու ամսվա ընթացքում Հայաստան են արտահանձնելու Հրաչյային»,- նշեց տիկին Անահիտը:

Նա հերքեց տարածված լուրերն այն մասին, թե Հրաչյա Հարությունյանին ոչ թե արտահանձնում են, այլ փոխանակում՝ Հայաստանի ՔԿՀ–ներից մեկում իր պատիժը կրող ՌԴ քաղաքացու հետ:

Հրաչյա Հարությունյանի կինը փոխանցեց, որ ամուսնու հարազատները գտնվում են Ռուսաստանում և միայն նրանց միջոցով են երբեմն իմանում՝ ինչպես է ամուսինը. «Առողջական խնդիրներ ունի՝ ողնաշարի, սրտի հետ կապված, թևատակին ճարպագունդ կա, որը դեռևս պարզ չէ, թե ինչ է: Այնտեղ՝ հիվանդանոցում բուժումներ ստացավ, բայց լիարժեք բուժում չի ստացել»:

Հիշեցնենք՝ Հրաչյա Հարությունյանն իր «Կամազ» մակնիշի մեքենայով 2013-ի հուլիսի 13-ին ՌԴ Պոդոլսկի շրջանի մերձակայքում բախվել էր մարդատար ավտոբուսի, ինչի հետևանքով զոհվել էր 18 մարդ։ Նա դատապարտվել է 6 տարի և 9 ամիս ազատազրկման:

Դատավճռի համաձայն' Հրաչյա Հարությունյանը մեղավոր է ճանաչվել երկու հոդվածով' ճանապարհային երթևեկության և տրանսպորտային միջոցների շահագործման կանոնների խախտում, որն առաջացրել է ծանր հետևանքներ, և կեղծ փաստաթղթի օգտագործում:

Սոնա Հարությունյան