Կարմիր գծերի տուգանքի համար նվազագույն շեմը կսահմանվի 3000 դրամ (տեսանյութ)

Կառավարության հերթական նիստի ժամանակ ՀՀ արդարադատության նախարար Արփինե Հովհաննիսյանը ներկայացրեց վարչական իրավախախտումների վերաբերյալ ՀՀ օրենսգրքի նախագիծը: 

Նախարարը շեշտեց՝ ասել, որ այս նախագիծը կարևոր է, թերևս, նշանակում է ոչինչ չասել, և նախագծի կարևորությունը ընդգծելու համար ներկայացրեց նախագծի հետ կապված խոսուն փաստեր՝ նշելով, որ գործող օրենսգիրքն ընդունվել է նախորդ դարի 1985 թվականին և այդ պահից ի վեր օրենսգրքում կատարվել են փոփոխություններ, որոնք ունեն կարկատանի տեսք, և իրարամերժ, հակասական փոփոխություններ են կատարվել:

Արփինե Հովհաննիսյանն ընդգծեց, որ օրենգրքում շարունակում են օգտագործվել «ԽՍՀՄ տարածք, պատգամավորների խորհուրդներ, սոցիալիստական սեփականություն» և այլ եզրույթներ:

Նրա խոսքով՝ վարչական իրավախախտումների վերաբերյալ գործող օրենսգիրքը, ըստ էության, բացարձակապես ներքին տրամաբանական կապի մեջ չի գտնվում քրեական օրենսգրքի հետ. «Մի շարք խախտումների համար վարչական իրավախախտումների վերաբերյալ օրենսգրքում նախատեսված է ավելի բարձր պատասխանատվություն, քան քրեական օրենսգրքում: Կամ, քրեական օրենսգրքում նախատեսված խախտումներ կան, որտեղ վարչական իրավախախտումների վերաբերյալ օրենսգրքում դրանց համար կա նմանատիպ պատասխանատվություն նախատեսված»,- ասաց նա՝ ավելացնելով՝ հաշվի առնելով այն հանգամանքը, որ Արդարադատության նախարարությունը մշակում է նաև Քրեական օրենգիրքը, ըստ էության՝ հաշվի է առնվել և կապը վերականգնվել է:

«Այսօր գործող իրավակարգավորմամբ ավտոտրանսպորտային միջոցը կամ դրա կցորդը համայնքային ավտոկայանատեղիում կայանելու համար օրենքով սահմանված տեղական տուրքը չվճարելու համար կամ, այսպես կոչված, կարմիր գծերի կանոնները խախտելու համար նախատեսված է 5000 դրամի չափով վարչական տույժ։ Նախագծով առաջարկվում է 3000-5000 դրամ»,- ասաց ՀՀ Արդարադատության նախարար Արփինե Հովհաննիսյանը:

Նա խոսքով' մի շարք վարչական իրավախախտումների համար նախատեսված է նախազգուշացում, ինչպես նաև բացարձակ սանկցիան, բացարձակ տույժը փոխարինված է հարաբերական տույժով։

Նախարարն ընդգծեց, որպեսզի չառաջանա օբյեկտիվ հարցադրում, որ սա կարող է առաջացնել կոռուպցիոն ռիսկեր, նախատեսված է մեկ այլ սահմանափակող նորմ. «Խոսքը վերաբերում է կամայականության արգելքի սկզբունքին։ Այսինքն՝ եթե սանկցիան 3000-5000 դրամ է, ապա վարչական տույժ կիրառող մարմինը պիտի սահմանի՝ որ դեպքում՝ 3000, որ դեպքում՝ 4000, և որ դեպքում՝ 5000։ Եվ նմանատիպ փաստական հանգամանքների դեպքում մշտապես կիրառի հենց այդ սանկցիան»,- ասաց նա' ավելացնելով, որ այն ուղղակիորեն ամրագրված է Օրենսգրքում։

Արփինե Հովհաննիսյանը հստակեցրեց' եթե նույն փաստական հանգամանքներն են, ապա վարչական իրավախախտումը կատարվելու դեպքում վարչական տույժ նշանակող մարմինը պարտավոր է նշանակել վարչական տույժի նույն տեսակը և նույն չափը։

Սոնա Հարությունյան

Մանրամասները՝ տեսանյութում.