Ո՞ւր է 150 միլիոնը...

Բնապահպանության նախարարության՝ «Փաստ»-ի աղբյուրի վկայությամբ' նախարարությունը վերջին շրջանում ռեկորդային ծախսեր է կատարել գրեթե ոչնչի համար:

Բանն այն է, որ նախկին՝ խիստ ակտիվ ընդդիմադիր գործիչ, այժմ՝ բնապահպանության նախարար Արծվիկ Մինասյանը մոտ 150 միլիոն դրամի ծախս է կատարել ոչ թե բնապահպանական ծրագրերի համար, այլ միայն այդ ծրագրերի մասին իրազեկելու համար: Ո՞ւմ են իրազեկել, ո՞ր լրատվամիջոցներով, ո՞ր հարթակներում՝ դժվար է ասել: Դժվար է անգամ հիշել, թե ինչ բնապահպանական ծրագրեր է իրականացրել սույն նախարարությունը, որոնց մասին հանրությանը իրազեկելու համար այդչափ գումար ստիպված լինեին վատնել: Իսկ որ դա ծախս չէ, այլ վատնում՝ որևէ կասկած չի հարուցում:

Բնապահպանության նախարարությունն իրեն այսպիսի ճոխություն է թույլ տալիս մի պարագայում, երբ կառավարության գրեթե յուրաքանչյուր նիստի ընթացքում վարչապետը խիստ տոնով հանձնարարականներ է տալիս կապված գումարների նպատակային օգտագործման անհրաժեշտության հետ: Կառավարության կողմից խիստ խնայողությունների անցնելու մասին հայտարարությունը նշանակում է, որ Ազգային ժողովը, նախարարությունները, դատարանները, մարզպետարանները եւ այլ պետական կառույցներ պետք է վերանայեն իրենց տարեկան պլաններն ու հետաձգեն ծախսատար ծրագրերը:

Թերևս՝ Արծվիկ Մինասյանը, միայն իրեն հայտնի բնապահպանական ծրագրերի մասին հանրությանը իրազեկելը համարել է անհետաձգելի: Վերջին շրջանում այնպիսի տպավորություն է ստեղծվում, որ նախարարները միայն ֆիզիկապես են ներկա կառավարության նիստերի դահլիճում, և վարչապետն ինքն ասում է, ինքը՝ լսում իր հանձնարարականները: Եթե վարչապետը հետևողական չէ իր հանձնարարականների կատարումը վերահսկելու հարցում, ապա առնվազն հանրությունը պետք է Բնապահպանության նախարարին ուղղի շատ տրամաբանական այս հարցը՝ իսկ ո՞ւր են և ինչի՞ վրա են ծախսվել հարկատուների տված գումարները:

Ստելլա ԽԱՉԱՏՐՅԱՆ