Տիգրան Աթանեսյանը հայհոյանքներ է հնչեցրել. փաստաբանների ծեծուջարդի պատճառը հայտնի է

Ինչպես արդեն տեղեկացրել էինք, այսօր փաստաբաններ Տիգրան Աթանեսյանն ու Արմեն Սողոմոնյանն իրենց գրասենյակում բռնության են ենթարկվել:

Հայտարարվեց նաև, որ ծեծի ենթարկողները եղել են ՀՀ Փաստաբանական դպրոցի տնօրեն Սիմոն Բաբայանը, ՀՀ փաստաբանների պալատի նախագահի արտաքին հարաբորությունների գծով խորհրդական Վրեժ Խաչիկյանը, ՀՀ փաստաբանների պալատի նախագահի խորհրդական Գևորգ Մկրտչյանը:

ԼՈւՐԵՐ.com-ի թղթակցի հետ զրույցում փաստաբան Դիանա Շախրամանյանը որոշ մանրամասներ հայտնեց, թե ինչն է եղել ստեղծված թնջուկի պատճառը:

-Ի՞նչ եք կարծում տեղի ունեցած միջադեպը Փաստաբանների պալատի անդամների խմորումների արդյո՞ւնք էր, թե՞ անձերի միջև բախում:

-Կարծում եմ, որ հարցին կարելի է խմորումների տեսանկյունից նայել: Ինքս փաստաբանական համայնքի անցուդարձին հետևում եմ հիմնականում սոցիալական ցանցերի մասնագիտական խմբերի գրառումների միջոցով: Ցավում եմ, որ որոշ փաստաբանների կողմից խոսքի ազատության իրավունքը վերածվել էր չակերտավոր զենքի՝ այլ փաստաբանների հասցեին վիրավորական եղանակով օգտագործելու համար, որոնք շատ դեպքերում հայհոյախառն են:

-Ավելի կոնկրետ կարո՞ղ եք ասել ինչեր են գրվում և ո՞ւմ կողմից:

-Կոնկրետ Տիգրան Աթանեսյանի կողմից տարբեր փաստաբանների, այդ թվում նաև Սիմոն Բաբայանի հասցեին հայհոյանքներ են գրվել, որոնք անցնում են բոլոր սահմանները: Շատ դեպքերում կարդալն ուղղակի անկարելի էր:

-Ինչպե՞ս կավարտվի այս պատմությունը:

-Իրավական տեսակետից գնահատականներ չեմ կարող տալ, քանի որ ծանոթ չեմ միջադեպի մանրամասներին, կարծում եմ այստեղ քննությունն ամեն ինչ կպարզի, բայց իմ ցանկությունների հարթության մեջ կուզեի, որ կողմերը հաշտվեին և այս միջադեպով ավարտվեր որոշ փաստաբանների կողմից խոսքի ազատությունը ձևախեղելու արատավոր պրակտիկան:

Հիշեցնենք նաև, որ դեպքի առնչությամբ հայտարարություն էր տարածել ՓՊ նախագահ Արա Զոհրաբյանը, վերջինս հույս էր հայտնել, որ ճշմարտությունը կբացահայտվի, իսկ մեղավորները կենթարկվեն պատասխանատվության։