Freedom House-ն աշխարհում ԶԼՄ-ների ազատության ամենացածր մակարդակն է արձանագրել վերջին 13 տարում

Հասարակություն 28 Ապրիլ, 2017 14:19

Freedom House-ը՝ ԱՄՆ-ի եւ աշխարհի ամենահին իրավապաշտպան կազմակերպություններից մեկը, հերթական տարեկան զեկույցն է ներկայացրել այն մասին, թե ինչ վիճակում է մամուլի ազատությունը տարբեր երկրներում:

32-էջանոց փաստաթուղթն ընդգրկում է ամբողջ 2016 թվականն ու ընթացիկ տարվա առաջին ամիսները եւ բովանդակում է անմխիթարական եզրակացություն՝ այժմ աշխարհում մամուլի ազատությունը վերջին 13 տարվա ամենացածր մակարդակի վրա է:

Freedom House-ի դասակարգմամբ, այսօրվա դրությամբ աշխարհի բնակչության միայն 13 տոկոսն Է օգտվում ազատ մամուլից, ինչը նշանակում է, որ «գտնվում է այն իրավիճակում, երբ զանգվածային լրատվության միջոցները քաղաքական նորությունները լուսաբանում են լիարժեք, լրագրողների անվտանգությունը երաշխավորված Է, ԶԼՄ-ների գործերին պետության միջամտությունը նվազագույնն Է, իսկ մամուլը չի ենթարկվում ծանրացուցիչ իրավաբանական կամ տնտեսական ճնշման»:

Մոլորակի բնակիչների 42 տոկոսն ապրում Է մամուլը մասնակի ազատության պայմաններում, իսկ 45 տոկոսն ապրում Է այնպիսի երկրներում, որտեղ մամուլի ազատություն չկա:

Freedom House-ը վերլուծել Է իրադրությունն աշխարհի 199 երկրներում ու տարածքներում եւ եզրակացրել, որ մամուլի ազատության տեսակետից այժմ ամենավատ իրադրությունը տիրում Է Ադրբեջանում, Իրանում, Ղրիմում, Կուբայում, Հյուսիսային Կորեայում, Սիրիայում, Թուրքմենստանում, Ուզբեկստանում, Հասարակածային Գվինեայում եւ Էրիթրեայում:

Մամուլի ազատության մակարդակը կազմակերպության կողմից գնահատվում Է 100-բալանոց սանդղակով: 2016 թվականին այդ ցուցանիշն ամենից ավելի նվազել Է Լեհաստնում (6 բալով), Թուրքիայում (5), Բուրունդիում (5), Հունգարիայում (4), Բոլիվիայում (4), Սերբիայում (4) եւ Կոնգոյի Դեմոկրատական Հանրապետությունում (4):

Freedom House-ի զեկույցում ռուսական մեդիային տրվել Է «անազատ» կարգավիճակ: Ի դեպ, հետխորհրդային տարածքում «լիովին ազատ մամուլի» կարգավիճակ չի ստացել ոչ մի երկիր: Ռուսաստանը վարկանիշում զբաղեցրել Է 174-րդ տեղը՝ այն բաժանելով Բելառուսի հետ: Հայաստանը 137-րդ տեղում Է, Ուկրաինան՝ 111-րդ, Մոլդովան՝ 118-րդ, Վրաստանը՝ 102-րդ, Լատվիան՝ 44-րդ, Լիտվան՝ 26-րդ, Էստոնիան՝ 13-րդ: