Փաստաբանների միջև ծեծկռտուքի մեղավորները ենթարկվելու են պատասխանատվության. Արա Զոհրաբյան

Փաստաբանների պալատը կարգապահական վարույթ է հարուցել Տիգրան Աթանեսյանի գրասենյակում տեղի ունեցած միջադեպի առնչությամբ: Ապրիլի 28-ին լրագրողների հետ հանդիպման ժամանակ այս մասին ասաց ՀՀ փաստաբանների պալատի նախագահ Արա Զոհրաբյանը:

«Կարգապահական վարույթի շրջանակում գործի քննության ընթացքում կպարզվեն մեղավորները, փաստաբանի վարքագծի խախտողները կենթարկվեն համապատասխան պատասխանատվության»,- ընդգծեց Զոհրաբյանը:

Նրա խոսքով' ցավալի միջադեպ է արձանագրվել, մանավանդ, երբ դա կատարվել է մարդու իրավունքները պաշտպանող փաստաբանների միջև:

«Փաստաբանների կողմից նման կերպ հարցերի լուծումը հարիր չէ ժողովրդավարական պետությունում, դա առաջացնում է մտահոգություն: Փաստաբանների պալատը դատապարտում է ցանկացած ոտնձգություն' լինի դա վիրավորանք, թե բռնություն»,- ասաց Փաստաբանների պալատի նախագահը:

Զոհրաբյանը կարծում է, որ Փաստաբանների պալատը պետք է ավելի խիստ միջամտի սոցիալական ցանցում փաստաբանների կողմից վիրավորական գրառումներին, հակառակ դեպքում կարող են նման միջադեպերը կրկնվել:

Այն հարցին, թե փաստաբանների պալատը ինչ քայլեր է ձեռնարկելու, որ նման միջադեպերը բացառվեն, Զոհրաբյանը պատասխանեց.

«Նմանատիպ միջադեպերի բացառումը տեսնում եմ միայն իրավական դաշտում: Փաստաբանը առաջին հերթին պետք է չվիրավորի մյուս փաստաբանին, փաստաբանը կարող է քննադատել մյուս փաստաբանին, և վիրավորված փաստաբանը չպետք է հարաբերություններ պարզի ոչ իրավական ճանապարհով: Նրանք պետք է օրինակ ծառայեն և փորձեն ավելի հանդուրժող լինել միմյանց նկատմամբ»,- եզրափակեց Զոհրաբայնը: