Յիրիկյանի ապագան որոշվե՞լ է…

Վերջին շրջանում ՀՀ կառավարության նիստերի ընթացքում վարչապետ Կարեն Կարապետյանի զայրույթի և քննադատությունների ամենամեծ չափաբաժինն ուղղված է Տրանսպորտի և կապի նախարարության գործունեությանը:

Ակնհայտ է, որ սույն գերատեսչության աշխատանքների որակը և բովանդակությունը վարչապետին չի բավարարում: Ըստ նրա՝ ոլորտում առկա հարցերը կուտակվել են և լուծում չեն ստանում: Այլ հարց է, թե ինչու է վարչապետը այդ խնդիրներին որոշել անդրադառնալ հենց հիմա, երբ եկել է նոր կառավարություն ձևավորելու ժամանակը, քանի որ ոլորտում առկա խնդիրները երեկ չեն ի հայտ եկել և նույնիսկ հասցրել են կուտակվել: Այնպիսի տպավորություն է, որ վարչապետի քննադատությունը շատ նպատակային է:

Դրա վկայությունն է վերջին օրերին ակտիվորեն տարածվող տեղեկատվությունը Վիվա Սել ՄՏՍ-ի տնորեն Ռալֆ Յիրիկյանի՝ Տրանսպորտի և կապի նախարար նշանակվելու վերաբերյալ: Ինչպես երևում է՝ որոշում է կայացվել ապագա Կառավարությունում ներգրավել այն անձանց, ովքեր ունեն բարձր վարկանիշ, որպեսզի նրանց վարկանիշը ավտոմատ կերպով փոխանցվի Կառավարությանը: Յիրիկյանը, ըստ Կարապետյանի մտահղացման, հենց այն մարդկանցից մեկն է, որը բարձրացնելու է նոր կառավարության վարկանիշը:

Այդ է պատճառը, որ այժմ տարբեր լրատվամիջոցներ հատուկ աշխատում են այս ուղղությամբ՝ Ռալֆ Յիրիկյանին ամենուր ներկայացնելով որպես բարեգործ և այլն, փորձելով հնարավորինս աճեցնել նրա վարկանիշը: Կարապետյանի այս կաբինետում շեշտը դրված էր լավ մենեջեր լինելու վրա, ինչպես երևում է՝ գալիք կառավարությունում որոշել են հենվել հասարակության շրջանում հեղինակություն վայելող անձանց վրա, բայց արդյո՞ք նրանք կկարողանան բարձրացնել արդյունավետությունը, եթե Կարապետյանի կողմից այդքան գովաբանված ոլորտների գիտակները և լավ մենեջերները ձախողեցին:

Ստելլա ԽԱՉԱՏՐՅԱՆ