Հայ-թուրքական ներդրումը ո՞րն է . քաղաքագետ

Այսօր Հայաստանում մեկնարկեց Հայաստան-Թուրքիա ներդրողների առաջին հանդիպումը, որի նպատակն է մեր երկիր բերել թուրքական ներդրումներ՝ Հայաստանում ստեղծելով «հրեշտակ» ներդրողների ցանց:

Հաշվի առնելով հայ-թուրքական պատմական անցյալն ու ներկա փուլում բացակայող դիվանագիտական հարաբերությունները, դժվար չէ պատկերացնել այն արձագանքը, որը կստանա այս նախաձեռնությունը հայաստանյան իրականության մեջ, իսկ, եթե սրան էլ հավելենք, օրինակ, թուրքական լոլիկի և ադրբեջանական խնձորի շուրջ Հայաստանում ստեղծված աղմուկը, ապա ակնհայտ է դառնում, որ Հայաստան-Թուրքիա ներդրողների այս նախաձեռնությունը ոչ միանշանակ ընկալում կունենա մեր երկրում:

Քաղաքագետ Լևոն Շիրինյանը մեզ հետ զրույցում խոսելով այս նախաձեռնության մասին, պնդեց, որ այն չի բխում Հայաստանի շահերից, հետևաբար, ինքը դեմ է հայ-թուրքական տնտեսական այս համագործակցությանը. «Հայաստանում ներդրումները մսխվում են, իսկ Թուրքիայից էլ կարիք չունենք որևէ ներդրման և, հետևաբար, երկիրն ուժեղացնելու համար պետք է նախ երկրի հարկային դաշտը կարգավորել: Հայաստանին ներդրումներ պետք չեն Թուրքիայից: Նախքան ներդրումների մասին խոսելը, Հայաստանում թող հարկային դաշտը դարձնեն այնպիսին, որ մեր երկրի ներսում բիզնես անողը չթողնի հեռանա: Այստեղ այնքան փող կա, թող դա կարողանան աշխատեցնել: Հայ-թուրքական ներդրումը ո՞րն է»: 

Քաղաքագետի համոզմամբ՝ մեր մաքասային ծառայությունները թերանում են իրենց աշխատանքում՝ ասվածի ապացույցն ադրբեջանական անհայտ խմբաքանակի մուտքն էր հայաստանյան շուկա, հետևաբար՝ անվտանգության տեսակետից՝ հայ-թուրքական այս նոր ձևաչափը լուրջ վտանգ կարող է դառնալ մեր երկրի անվտանգության համար:

«Մենք առանց Իրանի ապրել չենք կարող, հետևաբար, պետք է այս ուղությամբ տարվեն աշխատանքները, մեր երկրում թուրքական տարրի մուտքին դեմ եմ կատեգորիկ»: 

 Աղավնի Սուքիասյան