Հանցավոր անփութության հետևանքները...

Վերջին մի քանի օրվա ընթացքում ցրտահարությունից տուժել են Այրում քաղաքի, Արճիս, Լճկաձոր, Դեղձավան, Պտղավան, Բագրատաշեն, Դեբեդավան, Հաղթանակ գյուղերի պտղատու այգիները եւ ցանքերը:

Սրանք ընդամենը մի քանիսն են տուժած բնակավայրերի ցանկում, իսկ տուժել են նրանք բնավ ոչ բնության քմահաճույքի պատճառով: Գյուղացիները կրկին փաստի առջև են կանգնել, քանի որ օդերևութաբանության կենտրոնի պետ Գագիկ Սուրենյանը ցրտահարությունից մեկ օր առաջ ի պաշտոնե հայտարարեց, որ մարդկանց անհանգստությունը, թե մոտակա օրերին ցրտահարություն է սպասվում, անհիմն է: «Ցրտահարությունների վտանգը հանրապետության հովտային և նախալեռնային գոտիներում կարող ենք համարել ավարտված »- հայտարարեց նա:

Անշուշտ, տուժած գյուղացիներն այժմ մտածում են՝ ինչպես են պատկան մարմիններից իրենց իսկ հանցավոր անգործության արդյունքում կրած կորուստների դիմաց փոխհատուցում կորզելու: Նման պարագայում անգամ դժվար է պարզորոշ կերպով առանձնացնել մեղավորներին: Հեշտությամբ կարելի է ասել՝ «եղանակի դեմ խաղ չկա»: Մինչդեռ՝ անգամ եղանակի դեմ խաղ կա, եթե աշխատանքը կատարվում է որակով, պատասխանատվության զգացումով և արդյունավետ: ԱԻՆ Հիդրոմետ ծառայությունը պատահածի համար մեղքի հսկայական չափաբաժին ունի:

Այդ ծառայությունը ստեղծված է ու ֆինանսավորվում է հենց այն նպատակով, որ քաղաքացիներին առավելագույնս ամբողջական ու հավաստի ինֆորմացիա փոխանցի հնարավոր եղանակային ճգնաժամերի մասին: Ինչպես վկայում են գյուղացիների միլիոնների հասնող վնասները՝ ծառայությունը թերացել է և լուրջ: Արդյունքում ձևավորվում է խնդիրների տհաճ մի շղթա՝ բերքի կորուստ, վնասների փոխհատուցման համար գյուղապետերի ու կառավարության դուռը ընկնելը, վարկերը մարելը և այլն: Պատկան մարմինները գյուղացիների հոգսերը մեղմելու փոխարեն ավելացնում են խնդիրները: Ի՞նչ է սա՝ պրիմիտիվ տգիտությո՞ւն, թե՞ հանցավոր անփութություն….

Ստելլա ԽԱՉԱՏՐՅԱՆ