«Հրապարակ». Դարձ ի շրջանս յո՞ւր

«Հրապարակ» թերթը գրում է․

«Մեր տեղեկություններով՝ ընդամենը յոթ ամիս առաջ նախագահի աշխատակազմի ղեկավարի առաջին տեղակալ նշանակված Ալեքսան Հարությունյանն առաջիկայում հնարավոր է ազատվի այդ պաշտոնից եւ վերադառնա նախկին աշխատանքին՝ Հանրային հեռուստառադիոընկերության խորհրդի նախագահի պաշտոնին: Նա այդ պաշտոնն զբաղեցրել է 2003-2013թթ․, որից հետո տեղափոխվել է դիվանագիտական ոլորտ, նշանակվել Արգենտինայում ՀՀ դեսպան: Այժմ Հանրային հեռուստառադիոընկերության խորհրդի նախագահի պաշտոնն զբաղեցնում է Ռուբեն Ջաղինյանը: «Ջազին» նույնպես անպաշտոն չեն թողնի՝ նախագահական ընտանիքը նրա նկատմամբ ջերմ զգացումներ է տածում: Նշենք, որ Ալեքսան Հարությունյանի գործը Բաղրամյան 26-ում լրատվամիջոցների «կուրացիան» էր, նա այս պաշտոնում փոխարինեց Սեւակ Լալայանին, ով ավելի լիբերալ մոտեցումների կողմնակից էր։ Ենթադրվում էր, որ Ալիկ Հարությունյանը պետք է «գեբելսյան» մեթոդներով փորձի կառավարել լրատվական դաշտը՝ աչքի առաջ ունենալով քոչարյանական Հայաստանի եւ պուտինյան Ռուսաստանի օրինակը, սակայն 7 ամսվա աշխատանքը ցույց տվեց, որ դա անհնարին է՝ մամուլն այս տարիներին որոշակի ազատություն է նվաճել, որից հրաժարվելը կամ հրաժարեցնելն իրատեսական չէ»։

Մանրամասները՝ թերթի այսօրվա համարում։