Ապրիլյան պատերազմի մասնակից Դանիել Դավթյանն առողջական լուրջ խնդիրներ ունի

Տեղյակ չեն պահում, թե ինչն է արտերկիր չտեղափոխելու պատճառը:

Այս մասին այսօր «Քառօրյա պատերազմից մեկ տարի անց ինչպես են ապրում զինվորները և ինչ խնդիրներ ունեն. այսօր զինվորը որքանով է պատրաստ պաշտպանել հայրենիքը. մոտենում է Շուշիի ազատագրման օրը» թեմայով ասուլիսի ժամանակ հայտարարեց Ապրիլյան պատերազմում հրազենային վնասվածքներ ստացած Դանիել Դավթյանը:

Ապրիլյան պատերազմի օրերին Դանիելը վիրավորվել է Մատաղիսում. «Ստացել եմ գանգուղեղային վնասվածք: Հիմա իմ գլխում երկու բեկոր է մնացել, սկզբում չորսն է եղել, հեռացրել են, սրանք չեն նկատել՝ մնացել է: Մարմնիս մեջ էլ կան բեկորներ և ասում են, որ շուտ պետք է հանել»,- նշեց նա:

Նրա խոսքով' այժմ վերականգնողական բուժում է ստանում, որն իրականացվում է պետության կողմից. «Կային խոսակցություններ, որ արտերկիր տեղափոխվեի, սակայն հետո որոշվեց՝ այստեղ շարունակեմ բուժումը, քանի որ այստեղ ևս հնարավոր է»:

Հարցին' ով է հոգալու այդ ծախսերը, զինվորականն ասաց, որ գումարի մասին դեռևս խոսք չի գնացել:

Նա նշեց՝ բարերարներն են իրենց գտնում և աջակցություն ցույց տալիս:

«Այդ կռիվն անիմաստ բան էր, ինչի՞ պիտի լիներ, շատ ցավալի է, սակայն եթե նորից լինի, միանշանակ նորից կկանգնեք սահմանին»,- ասաց նա՝ ընդգծելով, որ հող չեն տալու թշնամուն:

Սոնա Հարությունյան