Շևարդնաձեն Հիլարի Քլինթոնին կոչ է արել հանդիպել Բիձինա Իվանիշվիլիի հետ

Վրաստանի նախկին նախագահ Էդուարդ Շևարդնաձեն ԱՄՆ պետքարտուղար Հիլարի Քլինթոնին կոչ է արել Վրաստան կատարելիք այցի ընթացքում հանդիպել «Վրացական երազ» ընդդիմադիր կոալիցիոն շարժման առաջնորդ, միլիարդատեր Բիձինա Իվանիշվիլիի հետ։

«Asaval Dasavali» վրացական թերթին տված հարցարզրույցում Վրաստանի նախկին նախագահն ասել է, որ Քլինթոնը Վրաստանում պետք է հանդիպի Ինանիշվիլիի հետ, քանի որ նամ մայիսի 27–ին Թբիլիսիում անցկացնելով զանգվածային հանրահավաք, ստացել է վրացի ժողովրդի մեծամասնության աջակցությունը, ինչը շատ կարևոր է Վրաստանի ապագա նախագահական ընտրություններում։

ԱՄՆ Պետքարտուղար Հիլարի Քլինթոնը տարածաշրջանային այցի շրջանակներում հունիսի 5-ին կժամանի Բաթումի, ուր հանդիպում կունենա Վրաստանի նախագահ Միխեիլ Սաակաշվիլիի և քաղաքացիական հասարակության ներկայացուցիչների հետ։ Այցի ընթացքում կքննարկվեն Վրաստան-ԱՄՆ ռազմավարական գործընկերության հետ կապված հարցեր։

Իվանիշվիլիի գրասենյակը մայիսի վերջին Քլինթոնի հետ հանդիպելու խնդրանքով դիմել է Վրաստանում ԱՄՆ–ի դեսպանատուն։