Պետքարտուղար Քլինթոնը ներկա գտնվեց Հայաստանում իրավունքների պաշտպանների մեծարմանը նվիրված միջոցառմանը

ԱՄՆ–ի Պետքարտուղար Հիլարի Քլինթոնը Հայասատանում ներկա է գտնվել ԱՄՆ-ի դեսպանության, «Քաունթերփարթ ինթերնեյշնլ» կազմակերպության, Մեծ Բրիտանիայի դեսպանության, ԵԱՀԿ-ի և ԵՄ-ի գրասենյակների կողմից կազմակերպված համընդհանուր իրավունքներին նվիրված մրցանակների հանձնման արարողությանը, որով մեծարվում էին այն անհատները, ովքեր հանդես են գալիս Հայաստանում մարդու իրավունքների պաշտպանության, հաշվետու կառավարման ու ազատ խոսքի խթանման դիրքերից։ 

Այս մասին հաղորդագրություն է տարածել Հայաստանում ԱՄՆ-ի դեսպանությունը՝ նշելով նաև, որ Քլինթոնը ողջունել է միջոցառման մասնակիցներին և առանձին հանդիպում ունեցել մրցանակներ ստացած անձանց հետ։

Հաղորդագրությունում նշվում է, որ համընդհանուր իրավունքներին նվիրված մրցանակների հանձնման այս միջոցառումը միջազգային կառույցների առաջին համատեղ նախաձեռնությունն էր՝ ուղղված Հայաստանում մարդու իրավունքների պաշտպանության ասպարեզում քաղաքացիական ակտիվիստների, պետական պաշտոնյաների ու ԶԼՄ–ների ներկայացուցիչների ներդրումների ներկայացմանը։

Միջոցառմանը ներկա են եղել Հայաստանի պետական պաշտոնյաներ, օտարերկրյա դիվանագետներ, ՀԿ-ների և ԶԼՄ-ների ներկայացուցիչներ։