Վրաստանը չի կարող դառնալ միջնորդ՝ Ղարաբաղյան հարցում

Հոկտեմբերի 26–ին Վրաստանի հանրապետության Արտաքին գործերի նախարար Գրիգոլ Վաշաձեն Բաքվում իր գործընկերոջ՝ Մամեդյարովի հետ համատեղ ասուլիսի ժամանակ հայտարարեց, որ Հարավային Կովկասն ամբողջական օրգանիզմ է, այն մասնատելն անթույլատրելի է, երեք պետություններն էլ պետք է ընկալեն, որ հավասար են, և բոլորի անկախությունն ու ինքնիշխանությունը կապակցված է. «Եթե երբևէ Ղարաբաղի հարցում ծրագրվի Վրաստանի միջնորդությունը՝ պատրաստ ենք աջակցել»։

Կողմերը տարբեր մեկնաբանություններ արեցին. այն որ այդ հայտարարությունը ոչ տխրեցրել է հայերին, ոչ ուրախացրել ադրբեջանցիներին, և որ հայտարարությունը մնացել է օդում։

Վրացի քաղաքագետ Պաատա Զաքարեիշվիլին կարծում է, որ Վրաստանը չի կարող միջնորդ լինել Ղարաբաղի հակամարտության հարցում։

«Վաշաձեն այդ բանն ասել է ասելու համար։ Այդ հարցին անգամ Թուրքիան չի կարող խառնվել՝ չնայած տարածաշրջանում իր ազդեցիկ դիրքին»,– ասել է Զաքարեիշվիլին։

«Վրաստանն այդ խնդրին չի կարող մոտենալ։ Վրաստանը, որպես Հայաստանի համար չեզոք դիրքում հանդես եկող պետություն, չի կարող հանդես գալ, քանի որ միջազգային բոլոր խորհրդաժողովներում Վրաստանը պաշտպանում է Ադրբեջանի շահերը։ Մյուս կողմից՝ ինքն էլ ունի երկու նման տարածք՝ Օսեթիա ու Աբխազիա»,– ասել է Սերգեյ Մինասյանը։

«Վրաստանն Ադրբեջանի հետ կոնֆեդերացիա ստեղծելու ցանկություն է հայտնել։ Բայց դա միայն քարոզչական ենթատեքստ չի պարունակում։ Իմ կարծիքով՝ առանց այդ էլ հայ–վրացական հարաբերությունները լավ են, թեև դրանք զարգացնելու մեծ ներուժ կա»,– ասել է Զաքարեիշվիլին։

Ջավախքի հայերին նման հայտարարություններն առանձնապես չեն հետաքրքրում, թեև նրանց կարծիքները փորձագետների ունեցածից շատ չեն տարբերվում։ Օրինակ ուսուցիչ Հասմիկ Միրզոյանը նշում է. «Նախարարը դա հայտարարել է Ադրբեջանի բարեհաճությանն արժանանալու համար։ Դա դիվանագիտական հայտարարություն էր և հայ–վրացական հարաբերությունները չեն տուժի։ Իսկ եթե անգամ Վրաստանը միջամտի, դրանում վատ բան տեսնել պետք չէ»։