Կամ ԱՄՆ–ն ի զորու չէ ազդել կողմերի վրա, կամ ԱՄՆ և միջազգային հանրության համար այդքան էլ էական չէ, թե ինչ կլինի. Ստեփան Սաֆարյան

Մեր երկրի օրինակից գիտենք, որ ԱՄՆ պետքարտուղարները հաճախակի, կամ կարելի է ասել ընդհանրապես չեն եկել Հայաստան։ Առաջին անգամ եկել են 2011–ին, երկրորդը՝ այս տարի։ Սա ցույց է տալիս մի բան, որ ԱՄՆ–ն պետք է ծանրակշիռ հիմքեր ունենանա մեր երկիր այցելելու համար։ Նման տեսակետ այսօր լրագրողների հետ հանդիպմանն հայտնեց «Ժառանգություն» կուսակցության ներկայացուցիչ Ստեփան Սաֆարյանը։

Նրա խոսքերով, այցելությունը սկսվեց Հայ–թուրքական արձանագրությունների ստորագրումից հետո, ինչից էլ կարելի է հասկանալ, թե ԱՄՆ–ի համար ինչքան կարևոր է սահմանի բացումը։ Ըստ Սաֆարյանի, սա ԱՄՆ–ի միակ շահը չէ, սակայն ծանրակշիռ է։

«Այցելության ընթացքում և ԱՄՆ պետքարտուղարի հրապարակումների մեջ մենք տեսանք, որ նա չափազանց կարևորում է գործընթացի շարունակությունը»,– ասաց նա։

Բանախոսը նշեց նաև, որ Քլինթոնի այցելության աշխարհագրությունը՝ Հարավկովկասյան երեք երկրներ և Թուրքիա, ևս ինչ–որ բան ասում է։

«Երբ աշխարհի մտահոգությունն Իրանի միջուկային ծրագրի մասին է, երբ Գերմանիան Իսրայելին տալիս է ավիակիրներ, երբ Սիրիայում ստեղծվել է քաոս, այս իրավիճակում Միացյալ նահանգները չի կարող անտեսել անգամ Հայաստանը։»,– ասաց Սաֆարյանը։

Սաֆարյանի համար մտահոգիչ էր այն փաստը, որ տարածաշրջանում լուրջ դերակատարում ունեցող պետքարտուղարության այցելության օրերին ՀՀ տարածքում և ԼՂՀ շփման գծում լարվածությունը հասնում է աննախադեպ չափերի, իսկ այցելությունը չի մեղմում իրավիճակը։

«Կա երկու պատճառ, կամ ԱՄՆ–ն ի զորու չէ ազդել կողմերի վրա, և մենք ունենք անկառավարելի հարևան, կամ ԱՄՆ և միջազգային հանրության համար այդքան էլ էական չէ, թե ինչ կլինի, անգամ եթե դա վերածվի լոկալ առճակատման»,– ասաց Սաֆարյանը։